Ôi 17/2 ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh Tâm nchră droh rklaih n'hanh ntrŭt ntrôl ntŭk tăch rgâl neh ntu n'hanh hun hao đăp mpăn, kloh rvah  n'hanh jŏ jong. Lah ta rơh tâm nchră, Thủ tướng Chính phủ Phạm Minh Chính an gĭt tâm nchră gay ŭanh năl nău ngăn geh bah ntŭk tăch rgâl neh ntu, ăp jêr jŏt, kŏ kol; dăn đă trong nkra đah ntŭk tăch rgâl neh ntu n'hanh ăp trong kan geh tât gay ntrŭt ntrôl ntŭk tăch rgâl neh ntu hun hao tay kloh rvah, jŏ jong.

Thủ tướng dăn đă ăp đại biểu tâm nchră ŭanh năl di ngăn ngăn nô nău; rblang gĭt nkô̆, lơn lah nkô̆ uănh lhơ; ntơm bah nê n'gluh rnoh tât kan, nău dơn kan, trong nkra hun hao ntŭk tăch rgâl neh ntu tâm di đah trong nchrăp, trong kơl, pháp luật bah Đảng, Ngih dak, tĭng wăng sa ntŭk tăch rgâl, rƀŏng tât trong xã hội chủ nghĩa. Tĭng Thủ tướng, lôch tâm nchră dja, Chính phủ mbra n'gluh an dŏng Nghị quyết bah Chính phủ mpeh ntŭk tăch rgâl neh ntu. Bah nê, ƀư ntŭk nsing gay ntrŭt ntrôl ntŭk tăch rgâl neh ntu hun hao đăp mpăn, kloh rvah n'hanh jŏ jong, nsing ta nău tâm ban geh đah Ngih dak, nuĭh ƀon lan, doanh nghiệp, nău nsĭt geh tâm di, rmoh rman tâm kơl.