Ta Hà Nội, lơ 8/3 hŏ geh rơh tâm nchră nau đăp mpăn Kruanh n’gâng kan Việt Nam-Nhật Bản tal 7. Thượng tướng Lương Tam Quang, Kruanh N’gâng kan Công an Việt Nam ndrel Groi Kruanh n’gâng kan Cảnh sát neh dak Nhật Bản Ogata Yoshimi nkre ƀư tơm tâm nchră. Kruanh n’gâng kan Lương Tam Quang lah rjăp, nau tâm nchră rnôk aơ lah rnôk gay ma nchră ăp nau kan geh nau dơi ngăn, tâm pă, tâm boh, tâm nchră sŏng mpeh ăp nkô̆ nau ma bar ding ndrel tâm rnơm, tâm ban nau rƀŏng, nkô̆ nau tâm boh ngăn, săk tam lơn tay, rklaih ăp nau kan mpeh phung tih dôih bah bar dak tâm rnôk mhe.

Tŏng dơi nau ŭch mât đăp mpăn, rnă njrăng, rdâng lơh phung tih dôih, rgop nau n’hao lơn tay nau tâm rnơm đah bar ding, yor nau geh jêng nsum bah bar dak, nkre lah, rgop nau mât đăp mpăn, nâp nâl ndrel hun hao bah nkuăl. Tâm rơh tâm nchră, tâm nuih n’hâm tâm boh, tâm rnơm ndrel tâm gĭt rbăng nsum, bar ding tâm ban gay lŏ n’hao dăng nau tâm boh kan nsum ngăn ngên, săk tam, tâm boh rjăp lơn tay tâm nau kan njrăng, rdâng phung tih dôih, mât đăp mpăn nau rêh, ueh lăng ân ƀon lan bar dak Việt Nam-Nhật Bản./.