Ôi 5/1, Tâm nchră n’glôch jêh pah kan năm 2023, an ƀư nău kan năm 2024 bah Chính phủ n’hanh n’gâng kan ta ntŭk hŏ dơi ƀư ta nâm nău rđău đă bah Thủ tướng Chính phủ Phạm Minh Chính.

Lah ta rnôk ntơm pơk tâm nchră, Thủ tướng Chính phủ Phạm Minh Chính đă tâm nchră rblang gĭt, uănh  năl pah kan rđău đă, nchŏng đă, ƀĭt juet bah Chính phủ tâm năm 2023 hŏ di, hŏ tŏng n’hanh geh nău mô uănh lhơ đŏng lah mô? Ntŭk mhe tâm rđău đă, ƀĭt juet năm 2023 lah moh ndơ? I ngăn, ăp gưl, ăp n’gâng kan, ăp n’gor hŏ rƀah gĭt nô nău n’hanh hŏ geh trong kơl năn ngăch, tâm di, geh nău tam đŏng lah mô...Nkoch mpeh lôch jêh geh hun hao wăng sa rêh jêng kon nuĭh năm 2023 Thủ tướng nchŏng kloh, nô nău hun hao wăng sa rêh jêng kon nuĭh năm 2023 dâk hao tay, khay bah kơi uĕh lơn  khay bah năp, quý bah kơi uĕh rlău quý bah năp, he hŏ dơi tât rnoh lam lĕ rngôch trong ndơ̆ luh lah đăp mpăn wăng sa têh, mât kân hao khlay ndơ, ntrŭt ntrôl hun hao, đăp mpăn lam rêh jêng kon nuĭh n’hanh nău rêh nuĭh ƀon lan dơi rgâl uĕh...nkah mpeh nău uănh ăl ăp nchiăng khan, mpăng đêt, jêr jŏt, ntul rlong Thủ tướng nchŏng kloh, ân ƀư kloh tay nkô̆ uănh lhơ n’hanh nkoch trong nkra na nê̆ đah 5 rnoh tât kan mô dơi tât trong nchrăp...gay geh trong nkra an năm 2024 tĭng ƀư geh nău dơi nău dơn kan ndơ̆ luh./.