Ta năp nu nău jŭr djơh bah Quốc lộ 14C lvang rlău nkuăl Dak Mil (Dak Nông), Cục Đường bộ Việt Nam lĕ tâm pă an 56,4 rmen prăk nkra tay ăp ntŭk djơh. Tơm prăk aơ dơi dŏng nkra tay lvang trong jong 11,4 km hăn rlău xă Đắk Plao, nkuăl Dak Mil. Ăp ndơ nkra lah neh trong, măt trong, trong n’hoch dak 2 đah n’hanh n’gâng ntăm ta trong, biển mbơh. Khay ƀư tâm 6 khay n’hanh jêh ta dŭt năm 2024.

Wa Bùi Văn Đoàn-Giám đốc Ban mât uănh nău nchrăp ƀư nkra trong (N’gâng kan ntung trong Dak Nông) an gĭt, aƀaơ nău nkra tay lĕ dơi ăp ntŭk kan ndâk ƀư geh rlău 10% rnoh ndơ ƀư, đăp mpăn ngăch tĭng n’gluh an. Quốc lộ 14C rlău n’gor Dak Nông jong rlău 162 km, ntơm bah nkuăl Buôn Đôn, n’gor Dak Lak hăn njok n’har bri n’gor Dak Nông tât nkuăl Bù Gia Mập, n’gor Bình Phước. Aơ lah trong me têh ngih dak, geh nău khlay hun hao wăng sa-rêh jêng ta n’har bri n’gor Dak Nông, rgop ƀư săk rnglăy nău kan mât njrăng bri dak rnă njrăng nkual Tây nguyên.