Buôn Ea Prí, xã Ea Wer, nkuăl Buôn Đôn, n’gor Dak Lak ăp nar dŭt khay 8 ndơn âk rhiăng tŏ cán bộ, tahen tâm Đại đội 5, Rnâng kan rđau tahen nkuăl Buôn Đôn hăn kan. Tahen tâm rgop ma n’gâng kan ndrel ntŭk kan chính trị-rêh jêng ƀư rep ăp ntŭk ntu nsum, kuih trong dak học, kơl ăp rnăk dơi kơl, rêh ndrâu pah kan, râng tăm ma rhiăng tơm si tâm ăp trong hăn bah ƀon. Ndrel râng đah tahen kơl an, kônh wa ta aơ gơih n’or lơn gay ƀư ueh nau hun hao văng sa, rêh jêng, kơl an bah rnoi mpôl, mpôl chroh, đăp mpăn neh dak. Wa Nguyễn Anh Dũng, Buôn Ea Prí, xã Ea Wer, nkuăl Buôn Đôn, ngơi:

‘Ăp năm tahen tât ƀon Ea Prí gay ma ndrel kônh wa râng ăp nau kan kuih kuaih trong học dak ndrle răk kloh ntŭk ntu bar đah trong, kơl an kônh wa ƀư lŏ, ƀư mir, gâp lah nŭih ƀon lan ri s aơ rhơn ngăn, rnôk tahen tât kônh wa kŏ ƀư ndrel ma tahen rep kloh trong kơt lah tâm ngih rƀŭn, mpih ngih, rep kloh ntŭk êp ngih gŭ gay đăp mpăn ân ntŭk ntu ndrih, kloh, ueh đŏng”.

Mô êng kơl an ƀon lan ƀư nau kan jâk, ma ăp rup gui bah tahen ndrel ao drih bah druh ndăm sinh viên ngih săm ƀŭt Đại học Tây Nguyên ndrel druh ndăm bah nkual tâm dăch, tâm kơl tât ăp ngih, ngăn lah rnăk geh nau rêh ach o. Ngăn lah rnôk nkoch mbơh mpeh nau ntrŭnh bah Đảng, Ngih dak, nau ƀư nkoch ân hleh, nơih nkah, nơih kơt tĭng, bah nê rnơm tâm nau rđau kan bah Đảng, n’gâng kan, kŏ kơt lah ƀư tĭng ntrong kan bah Đảng, nau ntrŭnh pháp luật bah Ngih dak. Thiếu tá Trần Văn Toàn, Chính trị viên Groi Rnâng kan rđau kan tahen nkuăl Buôn Đôn, n’gor Dak Lak, mbơh:

‘Đah Rnâng kan rđau tahen nkuăl Buôn Đôn kŏ gĭt kloh mpeh nkô̆ nau aơ, ƀư nau kan bonh đă lah ngoai tâm âk nkô̆ nau khlay tâm rnôk aơ. Đah kônh wa rlau 60% lah nŭih rnoi mpôl đê̆ ri hên kŏ geh nau kan nkoch trêng tâm dăch ma kônh wa lơn, nơih gĭt lơn, gleh lơn gay kônh wa gĭt dơi nau ntrŭnh bah Đảng ndrel Ngih dak tâm rơh tât ƀư ueh lơn”.

Tahen kŏ sĭt ƀon lan, nau ueh bah ƀon lan nkualư n’har bru kŏ geh rgâl đŏng. Ntơm nau kan ngăn, tahen kơl an ƀư nâp, nkra ueh rlau 11km trong hăn bah ƀon, rlau du km trong mương, kơl an kônh wa ƀư mir, rek ba, rklaih ntŭk ndjơh khuch, nkra nâp 5 ntŭk rƀŭn nsum, ngih ƀon lan, 2 ngihs ăm ƀŭt, ƀư ăp nau kan tâm n’ur njroh mprơ, khâl, pă nklâm ndơ ăp rnăk dơi kơl, tâm rgop nsum đah ne elah nau nkoch trêng, bonh đă ƀon lan ƀư ueh nau rêh văn hoá tâm ƀon lan, mât răk kloh ntŭk ntu, n’hao nau gĭt tâm nau ƀư kơt tĭng nau ntrŭnh bah Đảng, pháp luật bah Ngih dak. Đại tá Võ Văn Minh, Groi Chính uỷ N’gâng kan rđau tahen n’gor Dak Lak, ngơi:

‘Gay ƀư ueh ăp nau kan bonh đă ndrel nau kan tâm rnglăp đah tahen ndrel ƀon lan tâm n’gor tâm rơh tât, đah rmôt tahen bah n’gor ê lor phung hên hôm năl nau kan n’hao nau gĭt rbăng ânacán bộ, tahen mpeh nau kan bonh đă tâm rnôk mhe lah nau kan khlay. Gay dơi ƀư ueh nau kan aơ tât ăp nkuăl, uănh tât ăp ntŭk rnôk aơ ƀư ăp nau kan ƀư nau bonh đă mpeh tâm dâng bah ntŭk kan nơm hŏ geh lăp ngăn tâm nau ŭch ngăn bah kônh wa đŏng lah mô ndrel ăp nkuăl tơm, tă bah ne emơ ƀư ueh nau kan rgum lôch, nchră, nau kan rhuăt nau dơi geh blau ndrel ntrŭnh ƀư, pơk hvi ăp nau kan tâm rnglăp ma ƀon lan ndrel ma tahen tâm ăp nkuăl bah n’gor lah nsum, đah rmôt tahen bah n’gor lah êng”.

Đah nau kan “4 ndrel” tâm nau kan bonh đă tâm năm 2023, ăp rmôt kan tâm N’gâng kan rđau kan tahen tâm n’gor Dak Lak hŏ tâm rgop nsum ma ăp nkuăl kơp uănh, săch luh ăp nau kan gay geh ƀư khlay ngăn rnôk aơ gay ma kơl. Bah ăp nau kan, nau ƀư ri hŏ rgop ntop tay nau rhơn, ƀư duh tăm nuih n’hâm ndrel mpoh ang chông ŭnh rnơm ngăn bah kônh wa rnoi mpôl đê̆ tâm nkuăl neh n’har bri bah n’gor Dak Lak đah “tahen Wa Hồ”./.