Kônh wa ăp rnoi Tây Nguyên geh nau vay tâm rnglăp, tĭng cách mạng lơh phung rlăng tât in pit ndrel lơh rgot lơi phung Fulro. Rnôk tăng nau mbơh mpeh nau ƀư roh đăp mpăn nâp nâl chính trị ta Dak Lak, ăp bu ranh ta Tây Nguyên dŭt n’hâm ji nuih, dun lơi ndrel kuăl jă kônh wa ăp rnoi tâm rnglăp gay ma njrăng rdâng lơi phung ƀư rŭng răng. Bu ranh Kra Jan Ha Xuyên (rnoi K’ho) tâm thôn Đa Tế, xã Đạ Mrông, nkuăl Đam Rông, n’gor Lâm Đồng hŏ geh phung Fulro jă tĭng, jêh nê hăn gŭ du krap 12 năm tâm bri, wa gĭt kloh nau jêr jŏt rnôk geh tĭng nau mhĭk, tih dôih:

‘Kăl e nơh gâp rêh tâm bri lôch 12 năm ji gloh ji ngot, ach o, joi bum joi klĕ tâm bri lôch nar, ji kuet mro dơm. Rnôk gâp hăn sĭt ma Đảng, Ngih dak, n’gâng kan lŏ pơk trong nơih ân gâp geh kan pah, oh kon geh hăn nti. Rnơm geh Đảng, Ngih dak kơl an pă ân gâp geh kan pah tâm ngih dak, rnôk aơ geh ngih vâl đăp mpăn, geh ndeh klư hăn ro, nau rêh văng sa hun hao lơ. Gâp geh du đê̆ nau ŭch ngơi ma oh nô kônh wa nơm, nê lah lơi dĭng tĭng gâp ôh yor gâp lah ngoai tâm âk nŭih hŏ tă hăn tih trong, tĭng Fulro 12 năm mô geh du nau dơi ơm,  ri ma gâp hŏ plŏ sĭt ndrel geh Đảng, geh Ngih dak kơl an, rhuăt nau tă geh tih bah săk nơm, ri gâp du nuih n’hâm tĭng Đảng, Ngih dak mô djăt tĭng nau nsŭk đă, jă têk...nê lah nau gâp ŭch nkoch mbơh tât ăp nŭih.

Hôm wa Y Đoan (Nuĭh Bu Nong) Kruanh Ban mặt trận Bon R’Bút, xã Quảng Sơn, nkuâl Đắk Glong, n’gor Dak Nông ri năl lah: rlău mô gĭt dah âk krit jêr neh dak mơ dơi geh đăp mpăn gay kônh wa rvê wăng sa tuch tăm hun hao. Jêng kônh wa tâm ƀon dŭt nduih lah ăp nău ƀư roh đăp mpăn, rnă njrăng, lơh khuch tât nău rêh nuĭh ƀon lan:

“Krit jêr ngăn neh dak mơ dĭng đăp mpăn, bah tâm lơh tâm su gay đăp mpăn wăng sa ƀư mir ba jêng kônh wa ƀon hên nduih lah hô ăp nău ƀư roh đăp mpăn kơt ta Cư Kuin, Dak Lak. Ta ƀon mpôl hên ân ƀư hop mbro gay nkoch trêng an kônh wa tâm rnglăp, mô djăt tĭng mpôl tih djơh, njrăng an geh  roh đăp mpăn rnă njrăng”.