Tết Nguyên Đán Giáp Thìn 2024 dôl dăch tât, nău đăp mpăn tŏng ăp tơm ndơ tăch lah nkô̆ dơi ăp n’gor, ăp  doanh nghiệp ta ăp n’gor tâm nkual Tây Nguyên lor nchrăp an ƀư gay tŏng an nău ŭch geh rvăt năp ndơ bah nuĭh ƀon lan.

Năl geh ngăn ta ntŭk tăch rgâl, tât rnôk dja, ndơ tăch dŏng Tết nguyên đán Giáp Thìn 2024 ta n’gor Gia Lai dŭt âk mpưm mpeh ntil ndơ, săk ntô gay nuĭh ƀon lan rvăt năp. Ndrel đah ăp ntŭk tăch ndơ way ơm, ăp siêu thị, ntŭk rgum tăch rgâl têh way lah ăp ntŭk wăch rgum âk nuĭh dŏng rvăt đŏng yor đăp  mpăn gĭt kloh tu tơm luh. Wa Phạm Thị Diện, xã Cư An, thị xã An Khê, n’gor Gia Lai, hăn rvăt năp ta siêu thị Co.opmart nkual ƀon têh Pleiku, lah:

“Gâp saơ ăp ndơ tăch ta aơ âk ntil n’hanh kah uĕh, tăch bah dih chợ ri klach ndơ rlăm âk n’hanh mô đăp mpăn an n’hâm suan, ndơ tăch ta aơ săk ntô uĕh măt uănh, pla n’hơ nkah uĕh”

Wa Bùi Quốc Bình, Giám đốc Siêu thị Co.opmart nkual ƀon têh Pleiku, n’gor Gia Lai an gĭt, gay tŏng an nău ŭch geh ndơ rvăt, đơn vị hŏ rvăt n’glăp âk ndơ tăch gay rnă ntêm lor ndơ tăch rhŏ dŏng tết.

“Suan rvăt bah nuĭh ƀon lan tâm rnôk tết Giáp Thìn 2024 hao nklăp 3 tơ̆  rđĭl đah nar ngăn, mô an geh nău kroh khar ndơ  hao rnoh khlay, râng đăp mpăn ntŭk tăch rgâl siêu thị nchrăp nklăp 110 rmen prăk gay dŏng tăch an ƀon lan rnôk tết dja. Aƀaơ rnoh ndơ dja mpôl hên hŏ nchrăp n’hao lor bah năp Tết nklăp bar khay n’hanh aƀaơ ri kơt lah nklăp 60-70 % rnoh ndơ Tết hŏ rgum ta siêu thị. Ndơ tăch ân geh tơm  luh kloh rvah, ân đăp mpăn kloh uĕh ndơ sa”.

Tĭng nău mbơh bah Sở Công thương n’gor Gia Lai, lĕ rngôch rnoh rsong tăch rgâl ndơ n’hanh nsĭt geh rhŏ dŏng tăch Tết Nguyên đán nchroh nklăp 17.500 rmen prăk. Gay đăp mpăn tŏng ăp ndơ tăch tâm rnôk Tết, Sở Công thương đă ăp đơn vị, doanh nghiệp an ƀư trong rnă ntêm lor ndơ dŏng sa khlay gay đăp mpăn ntŭk  tăch rgâl, tĭng ƀư geh nău tam bôk nău kan đăp mpăn rnoh khlay ndơ, tĭng ƀư tăch ndơ di rnoh khlay lĭr nkrêp, mô an geh nău mô tŏng ndơ tăch, hao rnoh khlay. Nkre, ton ndơ dŏng sa khlay ân đăp mpăn săk kah uĕh, geh siƀŭt ăp tŏng, tơm luh kloh rvah. Wa Rcom Jen, Groi Giám đốc Sở Công Thương n’gor Gia Lai, lah:

“Sở Công thương hŏ n’gluh an dŏng trong nchrăp rnă ntêm ndơ tăch 2024, uănh năl mât kân ndơ tăch, ăp quy định mpeh đăp mpăn ndơ sa, tăch rgâl điện tử. Lôch rƀah gĭt nô nău nsum nău kan tăch rgâl dŭt đăp mpăn. Tĭng ƀư ăp bôk nău kan ntrŭt ntrôl dŏng rvăt âk ndơ, rdâk njêng âk bôk nău kan njŭr ndơ tăch sĭt ƀon lan, kan nsum đah nuĭh mât uănh ntŭk tăch rgâl gay uănh năl ndơ tăch, nkhêp ban saơ ndơ rlăm, ndơ mô kloh tu tơm luh ri mbra kan nsum đah nuĭh mât uănh ntŭk tăch rgâl rmal lhăt tĭng pháp luật dôl dŏng aƀaơ”.

Gay đăp mpăn tâm ban geh ndơ tăch rvăt, rhŏ dŏng an nuĭh ƀon lan rvăt năp, UBND n’gor Dak Lak an ƀư bôk nău kan đăp mpăn ntŭk tăch rgâl ăp ntil ndơ dŏng khlay nkhêp geh kêng dŭt năm 2023 n’hanh Tết Nguyên đán Giáp Thìn 2024. Ƀư đăp mpăn rnoh khlay ndơ ntơm bah bôk 12/2023 tât lĕ khay 2/2024. Rmôt ndơ tăch đăp mpăn rnoh khlay lah: Phe ba, puăch sŭr, puăch djăr, tăp kik djăr, dak ngi, đường, bột ngọt n’hanh ăp ntil ndơ sa nkret njêng, bum biăp), dak pring. Aơ lah ăp rmôt ndơ dŏng khlay, ŭch geh dŏng âk; dơh kroh khar ndơ tăch, hao rnoh khlay.

N’gor Dak Lak hŏ rgŏ jă geh 11 doanh nghiệp, siêu thị, lam ăp ntŭk tăch râng bôk nău kan đăp mpăn ntŭk tăch rgâl kêng dŭt năm 2023 n’hanh Tết Nguyên đán Giáp Thìn 2024. Nchrăp rnoh prăk dŏng gay rnă ntêm lor ndơ dŏng Tết rlău 473 rmen prăk, tŏng đah nău ŭch geh bơi 27% nău ŭch geh dŏng ndơ bah nuĭh ƀon lan nkhêp geh kroh khar tơm ndơ tăch. Rlău ma nê, rnoh âk ndơ tăch ta ăp chợ, ntŭk tăch ndơ lah du trong tăch têh tŏng an nău ŭch geh ndơ rvăt bah nuĭh ƀon lan tâm rnôk Tết. Wa Lưu Văn Khôi, Giám đốc Sở Công thương n’gor Dak Lak an gĭt, ndrel đah đăp mpăn ăp tŏng ndơ tăch rhŏ dŏng tết, n’gor ntrôl dăng ăp trong nking nchăng ndơ tăch mô nâp uĕh săk kah n’hanh mplư rlăm tăch rgâl:

N’gâng kan công thương ndrel đah Ủy ban nhân dân ăp nkuâl, thị xã, nkual ƀon têh mbra geh ăp trong nkra na nê̆ gay tŏng ăp tơm ndơ tăch tâm ban kơt đăp mpăn rnoh khlay ndơ. Bah meng nê lah n’hao dăng ăp trong hăn ôp uănh mât kân gay njrăng n’gang ndơ rlăm, ndơ mô nâp uĕh hôm njrăng n’gang mplư rlăm tăch rgâl đŏng.”

Gay nking nchăng nău ƀư ndranh, nkrâm ndơ, n’hao rnoh khlay mô tâm di; đăp mpăn rnoh khlay ntŭk tăch rgâl, Cục mât uănh ntŭk tăch rgâl n’gor Dak Lak mhe an ƀư trong nchrăp rdâng lơh tăch ntŭk, mplư rlăm tăch rgâl n’hanh ndơ mô nâp uĕh bah năp, tâm n’hanh bah kơi Tết Nguyên đán Giáp Thìn năm 2024. Ndrel đah nê ăp rmôt mbra ƀư groi nđôi lhăt nău kan tăch rgâl pring xăng, dak ŭnh long, mô an geh nău ƀư ndranh n’hao, nkrâm ndơ tăch, n’hao rnoh khlay mô tâm di gay rgop mât đăp mpăn ntŭk tăch rgâl gay rhŏ dŏng Tết an nuĭh ƀon lan./.