Wa Y Luyện Niê Kdăm, đại biểu Quốc hội khóa 10, tă ƀư Bí Thư N’gor ủy Dak Lak nkoch, lah nuĭh geh âk rgâl mhe têh dăng, ăp nău kan bah Tổng Bí thư Nguyễn Phú Trọng dơi nuĭh ƀon lan nsing nơm, ƀon lan ŭch.

Đồng chí roh lah roh du hê nuĭh kon gĭt blău bah Đảng, bah Ngih dak bah nuĭh ƀon lan. Đồng chí Tổng Bí thư lĕ hăn khâl n’gor Dak Lak, lah đồng chí dŭt uănh tât ƀon lan rnoi mpôl đêt, nău rêh jêng kon nuĭh, gŭ âm bah nuĭh ƀon lan, nĕ lah nău uănh ngăn.

Djôt dơn nău ntĭnh bah Tổng Bí thư Nguyễn Phú Trọng ta Đại hội Đại biểu lam dak Đoàn Thanh niên Cộng sản Hồ Chí Minh rơh tal 12, yuh H’Hương Buôn Krông, Bí thư Thành đoàn Buôn Ma Thuột (n’gor Dak Lak) sŏk nĕ ƀư nuih n’hâm gay tiăr nti nơm. Lơn lah hăn lor ntrong leo tâm nău nti nău rêh cách mạng; hăn lor tâm nti, pah kan jan sa, mĭn ƀư mhe; hăn lor tâm nău ƀư tĭng nău kan chính trị:

Nĕ lah nuih n’hâm an gâp nti tay n’hanh ƀư tĭng nău rêh, pah kan Hồ Chí Minh n’hanh êng săk wa Tổng Bí thư. Nti ta wa nău rah rơih, hăn jru, tiăr nti nău cần, kiệm, liêm, chính, chí công vô tư. Nti tay nău mĭn rêh, mô klach jêr, mô klach njê n’hanh nsrôih gay ndâk njêng janh dăng chính trị nâp nâl, geh nuih n’hâm kloh, nău mĭn uĕh, nău ŭch têh.

Tâm rơh tât khâl, pah kan ta n’gor Kon Tum tâm khay 4/2011, Tổng Bí thư, Kruanh Quốc hội Nguyễn Phú Trọng an mông nar tât khâl kônh wa rnoi nuĭh Ba Na ta ƀon Đăk Mút, xă Đăk Mar, nkuăl Đăk Hà. Ta aơ Tổng Bí thư mĭn joi mpeh nău rêh, djăt nău ŭch, nău ŭch n’hanh ntĭnh nuĭh ƀon lan mât uĕh nău tâm rnglăp, mĭn ƀư mhe tâm pah kan jan sa.

Jêh 13 năm Tổng Bí thư, Kruanh Quốc hội Nguyễn Phú Trọng tât khâl, aƀaơ lĕ geh nău rgâl âk tâm pah kan jan sa n’hanh nău rêh bah nuĭh ƀon lan thôn Đăk Mút, xă Đăk Mar, nkuăl Đăk Hà, n’gor Kon Tum. Rnôk Tổng Bí thư tât khâl, nô A Khiếu dôl lah Kruanh thôn, jêng nô nkah gĭt nâm ơm rơh nkoch bri bah Tổng Bí thư đah kônh wa ƀon lan.

Tổng Bí thư ntĭnh kônh wa tâm rnglăp mro, tâm kơl nsum, ndrel hun hao wăng sa rnăk wâl. Aƀaơ ăp jay tâm ƀon hun hao tuch tăm uĕh, tơm cà phê dơi mât chăm di kỹ thuật, săk geh âk. Tăng nău mbơh wa Tổng Bí thư roh, kônh wa ăp nuĭh rngot n’hanh ndrel an mông nar nkah gĭt tât Wa, nkoch nău kah gĭt Wa Tổng Bí thư lĕ ntĭm kônh wa trong ƀư sa. Kônh wa mpŏng wa dơi đăp mpăn gŭ đah drô phan.

Wa Lê Xuân Hưng, Bí thư Đảng ủy xă Đăk Mar, an gĭt, 13 năm nsrôih rgâl mhe, thôn Đăk Mút lĕ ndâk ƀư jêh thôn ƀon mhe. Na nao âk năm thôn dơi ăp gưl rnê nkhôm mpeh nău geh ta âk ntil. Rơh khâl bah Tổng Bí thư, Kruanh Quốc hội Nguyễn Phú Trọng rnôk nĕ lah ntrŭt nsôr nuih n’hâm têh kơl cán bộ, đảng viên ndrel nuĭh ƀon lan tâm xă tâm rnglăp nsrôih jêh ăp nău rƀŏng n’gluh an.

Tât năm 2014 xă Đăk Mar mpôl hên geh xă thôn ƀon mhe. Bah nĕ tât aƀaơ ƀư tĭng nău ntĭnh, ntĭm rđău bah Tổng Bí thư, kônh wa ƀon lan, lĕ rngôch cán bộ, đảng viên ƀư tĭng nău hun hao wăng sa, văn hóa rêh jêng lơn lah rgâl tơm tăm, mpa rong. Tât aƀaơ mpôl hên lĕ geh rĭng bôk nuĭh lah 56 rkeh prăk. Năm 2022, xă Đăk Mar mpôl hên lĕ geh xă thôn ƀon mhe n’hao prêh n’hanh mpôl hên dôl ndâk njêng xă thôn ƀon mhe ntrong leo tâm năm 2025.

Đah kônh wa ăp rnoi mpôl đêt ta xă Ayun, nkuăl Chư Sê, n’gor Gia Lai, Tổng Bí thư Nguyễn Phú Trọng mô knŭng nuĭh kruanh lôch nău rêh yor neh dak, yor ƀon lan, ma hôm lah nuĭh lĕ an kônh wa nău rêh hơm răm. Tâm rơh pah kan ta Gia Lai khay 4/2017, Tổng Bí thư Nguyễn Phú Trọng lĕ tât khâl xă Ayun-du xă dŭt jêr jŏt ta nkuăl Chư Sê. Djăt nău nkoch, nău ŭch kônh wa mpŏng geh dak bât gay tuch tăm lŏ mir, Tổng Bí thư lĕ ntĭm rđău nkuăl rgum prăk ngăch ndâk ƀư dak bât Plei Keo. 2 năm bah kơi, ndơ dak bât Plei Keo jêh ndơ̆ trong dak bah dak me Ayun sĭt ndrĭch lŏ nsĭt tay hơm răm an nuĭh ƀon lan. Wa Đinh A Nhur, 73 năm deh, ta ƀon AChông, xă Ayun nkoch:

Rnôk Tổng Bí thư Nguyễn Phú Trọng hăn khâl, gâp dŭt rhơn, dŭt răm mĭn mbra geh dak hôm. Aƀaơ dak me Ayun dơi hao kơh, hao yôk hôm, bah năp nĕ moh ndơ geh. Răm ngăn, du năm bah 2 yan tât 3 yan jêng kônh wa mô ji ngot.

Geh dak bât Plei Keo, nuĭh ƀon lan xă Ayun lĕ srih tăm rlău 300 ha ba lŏ 2 yan, đăp mpăn nău rêh. Bu ranh ƀon Đinh Miơch, ƀon Achông, ryơk ndơ an geh nkô̆ bah Tổng Bí thư đah kônh wa Ayun.

Kônh wa dŭt rhơn jêh rnôk Tổng Bí thư Nguyễn Phú Trọng ntĭm rđău an ƀon lan geh dak bât ri nău rêh ƀon lan hao. Mpôl hên mbra nkah gĭt mro n’hâm soan bah Wa lĕ an ƀon lan Ayun tâm nar aơ n’hanh rgŏ năp aơ tay.

Bah âk rơh hăn na nê̆, gĭt nu nău, djăt nău rgop, nău ŭch tâm di bah ƀon lan ăp rnoi mpôl đêt Tây Nguyên, Tổng Bí thư Nguyễn Phú Trọng lĕ ntĭm rđău n’gâng kan ƀon lan ƀư tĭng ăp nău kơl an lor ân nkual rnoi mpôl đêt ta Tây Nguyên. Bah nĕ, lĕ kơl ƀon lan ăp rnoi mpôl đêt ntŭk aơ nar lơ hơm răm, uĕh lăng. Kônh wa kah gĭt Tổng Bí thư Nguyễn Phú Trọng âk ngăn./.