Lễ hội Cà phê Buôn Ma Thuột (Dak Lak) tâl 8 lah du nău kan khlay dŭt nkah uĕh tâm năm 2023. Đah nkô̆ “Buôn Ma Thuột – Ntŭk rgum tât bah cà phê lam ntŭr neh” lễ hội hŏ geh nău dơi đah âk nău nkah uĕh tâm nuih n’hâm nuĭh ƀon lan n’hanh năch pâl nđaih.

Lễ hội hŏ nđơn nkoch trêng dơi 5 nău mpơl gĭt lor: ndơn tay; ntŭk rgum tât; lăp rgum; nău ring lam n’hanh têh lư dak bah dih đah nău nđơr ŭch n’hao ntŭk gŭ kan têh khlay bah Cà phê Buôn Ma Thuột; nkoch mbơh văn hóa Cà phê Buôn Ma Thuột tât băl mpôl dak bah dih. Tâm trôm nar lễ hội geh tâm nchră buăt nthoi tâm rsong tăch rgâl dak bah dih năm 2023 geh nău tât râng bah rlău 464 nuĭh ntơh măt, tâm nê geh 86 ntơh măt bah ăp mpôl kan dak bah dih lah đại sứ quán, lãnh sự quán ăp dak ta Việt Nam. Dŭt jêh tâm nchră geh 10 nkôp siƀŭt, nchih nkah tâm boh hŏ dơi ký ton đah ăp doanh nghiệp tăch n’gluh n’hanh ăp dak rvăt n’glăp tât bah Trung Quốc, Hàn Quốc đah doanh nghiệp Việt Nam.

Geh tât nau tâm nthoi trong kan tăch rgâl, tâm năm 2023, ăp n’gor bah nkuăl Tây Nguyên hŏ geh âk nau nsôih ndrel leo tât nau dơi ueh. Rđau kan n’gor Lâm Đồng hŏ râng, ƀư bôk nau kan tâm thoi ntrong ƀư kan tăch rgâl đah âk n’gor, nkual ƀon têh tâm dak, tâm mâp tâm boh ƀư du đê̆ nau kan đah Nhật Bản, Hàn Quốc, Ấn Độ.

Nau geh dơi ngăn, tâm dŭt năm 2023, trong mpar bah tach ndeh mpar Je-ju Air tă bah tach ndeh mpar In-chơn, Seoul, Hàn Quốc hŏ mpar sŏng tât tach ndeh mpar Liên Khương, n’gor Lâm Đồng nkah nau ndâk ntơm ueh, n’hao lơn tay nau nsôih tâm rgop nâp đah n’gâng kan n’gor Lâm Đồng ndrel Thủ đô Sơ-ul lah êng ndrel ăp n’gor, nkual ƀon têh bah Hàn Quốc lah nsum, rhuăt gleh nau tâm ƀah đah 2 n’gor, pơk trong nơih ân ƀon lan ndrel bu năch hăn uănh, kơt tĭng nti ndrel n’gor Lâm Đồng kŏ mpŏng ŭch pơk nau nsôih mhe tâm nau kuăl jă ntuh kơl, hun hao văng sa-rêh jêng./.