Ôi 24/2, ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh tâm nchră lam dak an ƀư pah kan dak si năm 2023. Tâm nchră dơi ƀư pơk sŏng dăng ta bôk ƀoh Nhih pah kan Chính phủ n'hanh nthoi đah bôk ƀoh ta 63 n'gor, nkual ƀon têh mpeh Trung ương. Ta tâm nchră, ăp nuĭh hŏ nchŏng luh ăp nău dơi geh, nău tă ơm gĭt nti n'hanh ăp nău nchiăng khan, rbăn lhơ kơt lam trong kan siƀŭt pháp luật hôm âk kŏ kol, lơn lah rvăt năp, ƀư ndranh, tâm rgop kan nsum, mât dŏng drăp ndơ ngih dak.

Nău dơi kan bah lam trong kan dak si tâm dâng, dak si rnă njrăng lor hôm đêt; nô nău lhăt bêng ir ta ăp nhih dak si bah lơ mô hŏ dơi nkra bah. Lah ta rơh tâm nchră, Thủ tướng Chính phủ Phạm Minh Chính rnê ăp nău dơi ma n'gâng kan dak si hŏ dơi geh tâm bah ri aơ, njuăl nău mbah rhơn dŭt uĕh lăng tât lĕ rngôch n'gâng kan dak si nkhêp nkah ndray 27/2. Tâm let năp tay, Thủ tướng dăn đă n'gâng kan dak si mât uĕh nău way ơm n'gloh ang, tĭng ƀư geh nău tam ăp trong nchrăp, trong kơl bah Đảng mpeh mât chăm n'hâm suan ƀon lan n'hanh pah kan rnoh nuĭh tâm nô nău mhe. Thủ tướng nchŏng kloh  ăp nău nchiăng khan, jêr jŏt ntul rlong ân nkra bah.