Ôi 21/12, Thủ tướng Chính phủ Phạm Minh Chính ƀư tơm tâm nchră ntrŭt ntrôl wăch rgum năch dak bah dih lăp tâm Việt Nam. Groi Thủ tướng Vũ Đức Đam, Bộ trưởng Văn hóa Thể thao n'hanh Pâl nđaih Nguyễn Văn Hùng ndrel ƀư tơm rơh tâm nchră. Ndrel râng geh kruanh ăp n'gâng kan n'hanh dơi pơk ƀoh sŏng dăng tât 63 n'gor nkual ƀon têh lam dak. Ntơm bah khay 3/2021, Việt Nam hŏ pơk tay lĕ rngôch ăp nău kan pâl nđaih.

Bol pơk mpông wơt năch dak  bah dih ơm lơn rđĭl đah ăp dak tâm nkual yơn nău ndăn rnôk dja gay hun hao hôm mpêt đê̆, mô hŏ rgum dơi âk năch pâl nđaih săk geh âk; rnoh âk năch dak bah dih hăn pâl nđaih tât Việt Nam mô hŏ geh kơt nău mpŏng, mhe tât rnoh khlay 42% rđĭl đah trong nchrăp ndơ̆ luh. Lah ta rnôk tâm nchră, Thủ tướng Phạm Minh Chính lah rjăp, pâl nđaih lah du n'gâng kan wăng sa khlay, rgop nar lơn ma têh tâm jâng wăng sa bah âk dak; ân geh nău mĭn mhe, trong tât mhe, tĭng trong rƀŏng "Pă an ăp ndơ rhŏ dŏng pâl nđaih ma năch pâl nđaih ŭch geh mô di ndơ ma he hŏ ơm geh".

VOV/Nuĭh rblang: Điểu Thân