Thủ tướng Chính phủ Phạm Minh Chính lĕ geh rơh mâp đah Groi Tổng thống Hoa Kỳ Kamala Harris di rơh râng Rƀŭn nchră gưl prêh ASEAN 43 n’hanh ăp rƀŭn nchră gưl prêh geh tât. Ta rơh mâp, Thủ tướng Phạm Minh Chính n’hanh Groi Tổng thống Harris nkoch nău ŭch đah ăp njoat hun hao têh dăng bah tâm boh kan ndrel lĕ rngôch Việt Nam-Hoa Kỳ, rƀŏng tât n’hao tâm boh tâm năm tât, ngăn lah ta ăp ntil wăng sa-tăch rgâl-ntuh kơl, khoa học-công nghệ, rgâl mhe mĭn njêng, ntĭm nti, tâm nđŭr nuĭh ƀon lan n’hanh mkră nău khuch tâm lơh tâm su.

Thủ tướng uănh lah prêh ăp nău rgop bah wa Kamala Haris an tâm boh 2 dak, ngăn lah nău kơl nuĭh ƀon lan Việt Nam vaccine njrăng n’gang Covid-19 n’hanh mpŏng mâp tâm tâm năm tât gay rgâl na nê̆ ăp tâm ton gưl prêh gay ntrôl tâm boh hăn jru hvi, săk rnglăy, ngăn ngên. Thủ tướng an gĭt Việt Nam dôl tâm rgop đah Hoa Kỳ gay nchrăp wơt Tổng thống Joe Biden uăh lăng tâm rơh khâl êp tât.