Nkhêp geh nar Noel năm 2024, Thủ tướng Phạm Minh Chính hŏ tât khâl, mbah rhơn Giáo xứ Lào Cai. Ntơh măt kruanh rđău kan Đảng, Ngih dak, Thủ tướng Phạm Minh Chính njuăl nău mbah rhơn Noel đăp mpăn, uĕh lăng tât ăp linh mục, tu sĩ n’hanh ƀon lan chroh bap Giáo xứ Lào Cai.

Thủ tướng lah rjăp Đảng, Ngih dak mpŏng Giám mục, Linh mục, kruanh chroh, nuĭh kơl kan, tu sĩ nthoi tay nuih n’hâm "Ryơk brah rŏng dak", "rêh uĕh chroh uĕh", chroh di nkre đah rnoi nuĭh, rgop uĕh tâm nău hun hao neh dak n’hanh n’hao tâm boh Việt Nam - Vatican nar lơn ma uĕh lăng. Thủ tướng lah rjăp, Đảng, Ngih dak Việt Nam way du trong an đăp mpăn dah rŏng chroh rƀŭn bah nuĭh ƀon lan, uănh khlay n’hanh nta ăp trong dơh gay ăp nuĭh tâm ban kơt ăp chroh kan, râng rdâk njêng, mât njrăng neh dak. Thủ tướng dăn đă gưl ủy, n’gâng kan ăp gưl n’gor Lào Cai n’hanh ăp n’gor lam dak ndrel Ban Tôn giáo Chính phủ way grêt dăch, ôp uănh ăp nkual jêr jŏt gay ngăch ntop kơl ƀon lan; mât chăm, đăp mpăn nău rêh an ƀon lan dơi geh du khay Noel uĕh lăng.