Kêng măng 25/12, Tâm nchră gưl têh Mê Công – Lan Thương (MLC) tâl puăn hŏ ƀư tĭng trong pơk sŏng dăng. Râng tâm nchră geh Thủ tướng, Kruanh mpôl ăp dak Cam-pu-chia, Lào, Mi-an-ma, Thái Lan, Trung Quốc n’hanh Việt Nam. Thủ tướng Chính phủ Phạm Minh Chính hŏ geh nău lah khlay ta tâm nchră. Tâm nchră rgum uănh năl lôch jêh geh tâm boh Mê Công – Lan Thương tâm pe năm aơ n’hanh tâm nchră trong rƀŏng an rơh mhe. Ăp kruanh rđău kan lah rjăp ăp nău rgop khlay bah (MLC) đah đăp mpăn, tâm boh n’hanh hun hao ta tiểu vùng Mê Công n’hanh nkual, nkre lah rjăp kan nsum tay lhăt, ndrel rdâk njêng nsum mpôl tâm pă nău đăp mpăn, têh ndrŏng đah ăp dak Mê Công – Lan Thương.

Mpeh trong rƀŏng tâm boh let năp tay, ăp kruanh rđău kan lah rjăp trong rƀŏng an hun hao lor, sŏk nuĭh ƀon lan ƀư rgum tơm, tâm lăp nsum đah kon nuĭh n’hanh bri dak. Tâm nchră tâm ban ŭch ntrôl dăng tâm boh ndrel rdâk njêng trong nduar hun hao wăng sa Mê Công – Lan Thương; gŭ mĭn nău dơi njêng trong tâm boh, kan nsum trong kơl, an ƀư trong nchrăp gay ntrŭt ntrôl trong soih aih rgâl mhe Mê Công – Lan Thương. Lah ta rơh tâm nchră, Thủ tướng Chính phủ Phạm Minh Chính lah rjăp, Chính phủ Việt Nam way uănh khlay n’hanh mbra ndrel Trung Quốc n’hanh ăp dak Mê Công ntrŭt ntrôl tay tâm boh Mê Công – Lan Thương nar lơn ma hun hao dăng, geh nău tam n’hanh jŏ jong./.