Mhe aơ, Thủ tướng Chính phủ Phạm Minh Chính hŏ râng tâm nchră pơk sŏng dăng n’glôch jêh năm nti 2022-2023 n’hanh nchrăp an năm nti mhe 2023-2024. Mpeh trong rƀŏng, nău dơn kan rgum tơm bah năm nti 2023-2024 Thủ tướng đă ăp n’gâng kan, ăp nhih pah kan, ăp n’gor ôp ŭanh tay ăp tŏng lam lĕ rngôch, rgâl nkra, kơi ntop năn ngăch trong đă tĭng ƀư, trong kơl, lôch jêh trong soih aih tâm di gay dơh an tĭng ƀư rgâl mhe ntĭm nti, dăp rgum rêng kan ntĭm nti đại học n’hanh sư phạm rơh năm 2021 - 2030, uănh ngai tât 2050 n’hanh ơm mbơh Trong nkra thi tốt nghiệp THPT tĭng bôk nău kan ntĭm nti phổ thông 2018.

Lơn lah Thủ tướng đă, leo ƀư jăp nău n’glôch jêh 10 năm tĭng ƀư Nghị quyết 29 bah TW mpeh rgâl mhe tơm, lam lĕ rngôch ntĭm nti; gŭ mĭn tay, wat jêh, hun hao bôk nău kan ntĭm nti phổ thông 2018 tâm di đah nău ŭch tât kan, nău ŭch geh ndơ̆ luh. Bah meng nê Thủ tướng jao ăp n’gâng kan, ăp n’gor kan nsum đah Bộ Giáo dục n’hanh Đào tạo geh trong nkra prăk kaih ntop kơl nai ntĭm nti  nkual jru, nkual ngai; ntuh kơl tay ndơ dŏng lơn ma mpeh trong ƀoh internet ta ăp nkual ƀon lan rnoi mpôl đê̆, mpeh yôk yang, gôl dak. Thủ tướng Chính phủ Phạm Minh Chính đă ăp kon se nti, sinh viên ân nsrôih, kơt nti n’hanh tiăr nti; nsrôih ndôr êng, lor nchrăp n’hanh njêng âk nău blău mhe lơn tâm ăp nău kan ntĭm n’hanh kơt nti.  

“Năm nti mhe 2023-2024, Thủ tướng mbah rhơn ăp cán bộ ƀư pah kan mât bôk ntĭm nti, ăp nai ntĭm nti way ntô̆ n’hao nuih n’hâm rŏng dak, nuih n’hâm dơn kan n’hanh lĕ nuih n’hâm đah  nău kan, nkra bah ăp jêr jŏt, rôih jong yor nău ŭch tât rgâl mhe bôk tơm, lam lĕ rngôch ntĭm n’hanh nti, tŏng đah nău  ŭch geh bah Đảng, Ngih dak n’hanh ƀon lan, rgop tâm di tâm nău hun hao têh dăng, ndrŏng kuâng bah neh dak”.