Ôi 26/7, ta Nhih pah kan Chính phủ, Thủ tướng Chính phủ Phạm Minh Chính hŏ mâp Tổng Bí thư, Kruanh dak Lào Thongloun Sisoulith n’hanh I ur nkhêp geh hăn Việt Nam râng Nar wer khĭt lam dak Tổng Bí thư Nguyễn Phú Trọng. 

Ta rơh mâp, Thủ tướng Phạm Minh Chính hŏ njuăl ăp nău lah uĕh dŭt n’hâm n’hanh tâng jru tât Đảng, Ngih dak n’hanh ƀon lan Lào lah nsum tâm ban kơt tât Tổng Bí thư, Kruanh dak Lào n’hanh I ur lah êng mpeh ăp nău tâm rŏng du nuih n’hâm, ndrăng băl oh nô an Đảng, Ngih dak n’hanh ƀon lan Việt Nam bah năp roh yot bah Tổng Bí thư Nguyễn Phú Trọng; lơn lah Lào hŏ ƀư nar wer lam dak bar nar gay nkah gĭt Tổng Bí thư Nguyễn Phú Trọng, bah nê mpơl nău tâm boh mha êng, du nuih n’hâm lhăt krêp, geh ngoăy mô bar đah bar dak. Thủ tướng Chính phủ lah rjăp, rnôk hôm rêh Tổng Bí thư Nguyễn Phú Trọng way dŭt uănh khlay  tât nău mât ndray, mô rlu rdâk nkah n’hanh hun hao tâm boh way ơm  mha êng Việt Nam – Lào; lah uĕh ur Tổng Bí thư, Kruanh dak Lào hŏ geh siƀŭt njuăl dŭt rngot njuăl I ur Tổng Bí thư Nguyễn Phú Trọng.