Ôi 23/12, Thủ tướng Chính phủ Phạm Minh Chính hŏ râng sa nkra Ntŭk rgum gŭ mĭn n'hanh hun hao (R&D)bah Tập đoàn Samsung ta Hà Nội.

Ntŭk rgum gŭ mĭn R&D mhe bah Samsung ta Hà Nội dơi ƀư ntơm bah khay 3/2020, ta nkual neh hvi rlău 11.600 m2, lah du roh jay prêh 16 dăp ntoh bah lơ 3 dăp ta nâm neh, lĕ  rngôch tơm prăk ntuh kơl 220 rkeh USD. Ntŭk gŭ rgum R&D bah Samsung ta Hà Nội lah Ntŭk rgum gŭ mĭn R&D dŭt têh Đông Nam Á n'hanh lah 1 tâm 8 ntŭk rgum gŭ mĭn R&D bah Samsung lam ntŭr neh. Ta ntŭk rgum gŭ mĭn R&D Hà Nội, Samsung nchrăp mbra ƀư gŭ mĭn n'hanh njêng âk điện thoại pet lât, máy tính bảng, phần cứng n'hanh phần mềm, wăch rgum nklăp 3.000 nuĭh lăp pah kan. Lah ta nar sa nkra, Thủ tướng Chính phủ Phạm Minh Chính lah rjăp, Ntŭk rgum gŭ mĭn R&D Samsung lăp kan lah jâng ntơm gay Samsung tĭng ƀư jêng ngăn ngăn hun hao; lah ndơ an saơ ăp trong nchrăp, trong kơl di bah Đảng, Ngih dak Việt Nam tâm nău kuăl jă n'hanh wăch rgum ntuh kơl tâm khoa học công nghệ, rgâl mhe, hun hao công nghệ mhe. Thủ tướng Phạm Minh Chính dăn đă ăp nhih pah kan trung ương n'hanh n'gâng kan ta ntŭk ntop kơl tay n'hanh nta trong dơh an nuĭh ntuh kơl dak bah dih, tâm nê geh Tập đoàn Samsung ntuh kơl ƀư tăch rgâl nsĭt geh n'hanh jŏ jong ta Việt Nam.

Kŏ tâm ôi 23/12, Thủ tướng Chính phủ Phạm Minh Chính hŏ vơt wa Lee Jea Yong, Kruanh rmôt kan Samsung Kruanh Samsung. Tâm nar mâp, Thủ tướng rnê prêh nau nsôih bah Samsung tâm nau rđau kan ntŭk kan R ndrel D, lah ueh ăp nau rgop bah Samsung đah Việt Nam tâm nau kan lah ntŭk kan tăch rgâl FDI têh ngăn, ntoh nau ryơk kơl đah Samsung mpeh ăp nau jêr, tâm rnôk geh srê Covid-19, ŭch geh nau dơi bah sam-sung ăp ntil lơn tay ta Việt Nam. Thủ tướng đă công ty n’hao nau dơi bah neh dak, rnoh ê nkra tâm Việt Nam, n’huch nau rvăt lăp tă bah dak ba dih. Kruanh Samsung lah rjăp mra nsôih ntrŭnh ăp nkô̆ ma Thủ tướng Chính phủ rđau đă, ntrŭt dăng nau ntĭm nti, hun hao nŭih kan geh tŏng nau dơi bah ntŭk pah kan bah lam ntur neh ndrel tâm rgop nsum đah Việt Nam gay ma n’hao lơn tay rnoh geh bah tâm dak nơm mpeh ma nau dăng ndrel phần mềm.

VOV/Nuĭh rblang: Điểu Thân n'hanh H'Thi