Kêng măng 8/2, lôch rnôk jŭr tach ndeh păr Changi, Singapore Thủ tướng ndrel i ur n'hanh mpôl kruanh gưl têh Việt Nam hŏ mâp cán bộ nuĭh kan Đại sứ quán n'hanh mpôl nuĭh Việt Nam ta Singapore.

Ta rơh mâp măt, Thủ tướng dŭt rhơn khâl ngăn Singapore kalơ nău  kan Thủ tướng Chính phủ Việt Nam n'hanh dơi mâp n'hanh nkoch bri đah kônh wa gŭ dak bah dih n'hanh cán bộ, nuĭh kan Đại sứ quán ta Singapore. Thủ tướng nsing nơm an lah, lôch jêh hăn khâl mbra njêng suan ntrôl mhe ntrŭt ntrôl tâm boh nar lơn ma dăng, jru hvi, ngăn ngăn, geh nău tam đah bar dak, bar rnoi nuĭh ta ăp trong kan.

Nuĭh mât bôk kan Chính phủ Việt Nam nkoch nar pah kan đah kônh wa ta aơ, păng an gĭt, nar aơ, păng mbra rgum nchră n'hanh mâp đah Thủ tướng Lý Hiển Long n'hanh ăp kruanh gưl têh êng ƀa ƀă bah Singapore. Thủ tướng mbra  tâm ôp đah kruanh Singapore mpeh ăp trong rƀŏng kan têh jong n'hanh trong nkra na nê̆ gay n'hao dăng nău nsing nơm chính trị, n'hao têh tâm boh ma nău ƀư jru hvi lơn ăp n'gâng tơm tâm boh, lơn lah n'gâng tơm wăng sa; hăn tât njêng tâm boh tâm brê "wăng sa mbrô- wăng sa nđĭr uĕh Việt Nam – Singapore".

Mpeh du đêt nău ŭch rŏng, mpŏng geh bah kônh wa, Thủ tướng dŭt n'hâm tâm pă nkoch, nchih nkah ăp nău rgop nê n'hanh mbra jao an  ăp n'gâng kan geh tât rgum tay, gŭ mĭn, ơm geh trong nkra tâm di nuih n'hâm ngăn ngăn, kloh rvah.