Ta năp nĕ, ôi lơ 9/2, tĭng mông ta ntŭk, Thủ tướng chính phủ Phạm Minh Chính n’hanh i ur lĕ tât mpoh su nhang ta rup ndah kahgĭt kruanh Hồ Chí Minh ta Bảo tàng ăp n’gâng kan văn minh châu Á n’hanh tât uănh khâl ntŭk tăm si gle Singapore.

Bảo tàng ăp n’gâng kan văn minh châu Á ta dăch dak me Singapore, lah du bảo tàng ta nkual geh ntêm êng gay ma uănh mât rbăy ăp ntil di sản nghệ thuật bâh châu Á, mpơl saơ nău tâm rgop lịch sử ăp n’gâng văn hóa bâh châu á đah châu Á n’hanh lam ntur neh. Tâm ntŭk têh hvi bâh Bảo tàng, ndrel đah kruanh Hồ Chí Minh n’hanh âk nuĭh leo kan, nuĭh ntoh lư ta châu Á êng geh mât ndrăy. Thủ tướng chính phủ, i ur n’hanh mpôl pah kan lĕ mpoh su nhang, mbah ryơk kahgĭt tât nău kan têh kuăng bâh kruanh Hồ Chí Minh, nuĭh têh dăng rklaih đăp mpăn mpôl rnoi, nuĭh ntoh lư mpeh văn hóa lam ntur neh.