Kêng măng 08/1 Thủ tướng Chính phủ Phạm Minh Chính hŏ ndơ̆ siƀŭt n’glêh an n’hao wa Lê Mạnh Hùng ƀư Bí thư Đảng ủy, Kruanh Hội đồng thành viên Tâp đoàn Dầu khí Việt Nam n’hanh râng tâm nchră n’glôch jêh pah kan năm 2023 n’hanh an ƀư nău dơn kan năm 2024 bah Tập đoàn Dầu khí Việt Nam.

Tĭng siƀŭt mbơh ta tâm nchră, năm 2023 n’gâng kan pring xăng hŏ geh âk nău dơi khlay, lơn  lah mpeh ƀư njêng tăch rgâl, lam tập đoàn hŏ lôch jêh n’hanh rlău lĕ rngôch ăp rnoh tât geh mpeh ƀư njêng tăch rgâl; lĕ rngôch nsĭt geh rlău 942 rbăn rmen prăk, hao 11,6 rbăn rmen prăk rlău âk năm 2022; lah doanh nghiệp geh rgop tay âk an ngân sách ngih dak, lah rjăp nău khlay kan bah Tập đoàn wăng sa ngih dak dâk bôk năp geh rnoh dŭt têh, suan ring tam đah jâng wăng sa bah neh dak. Lah ta rnôk tâm nchră, Thủ tướng Phạm Minh Chính đă, năm 2024 ăp nău dơn kan na nê̆  jao an Tập đoàn dầu khí ân dơi ƀư jêng ngăn ngăn tâm trong nchrăp bah Tập đoàn tâm ban kơt bah tĭng đơn vị gay leo tĭng ƀư n’hanh ôp uănh, groi nđôi. Lam Tập đoàn lơn lah ăp kruanh rđău kan mât nâp tay nău tâm rnglăp, dơn ngoăy; n’hao nuih n’hâm nănh mĭn nănh ƀư đah nău nđơr geh rdâk njêng n’hanh hun hao Tập đoàn Dầu khí Việt Nam lah đơn vị n’gâng tơm bah n’gâng kan Dầu khí, săk geh âk mpeh prăk kaih n’hanh khoa học công nghệ, rgop rdâk njêng neh dak têh dăng, ndrŏng kuâng, ƀon lan hơm răm, đăp mpăn./.