Ôi nar 15/2, tâm rnôk hăn pah kan ta Bến Tre, Thủ tướng Phạm Minh Chính hŏ hăn uănh tât ntŭk ƀư, ntrŭt ntrôl đă ƀư ngăch ntung Rạch Miễu 2 ta nkuâl Châu Thành n'hanh hăn uănh trong meng dak lêng Bến Tre. Trong nchrăp ƀư ntung Rạch Miễu 2 mbăk rlău dak me sông Tiền nthoi đah n'gor Tiền Giang - Bến Tre. Ntung jong 17,6 km, geh lĕ rngôch  tơm prăk ntuh kơl rlău 5.175 rmen prăk dơi tâm pă ƀư 6 gâl ntrŭp.

Ta rơh hăn ôp uănh, Thủ tướng đă Tiền Giang n'hanh Bến Tre rgum lam trong kan chính trị gay ơm ƀư lôch jêh đă ntrơn du, ngăch đăp mpăn nău rêh ƀon lan ntŭk ntrơn du mhe ân ŭeh rlău mô lah ban ntŭk gŭ ơm. Ăp nuĭh tơm ƀư ndranh rgum nuĭh kan, ndeh rklư, dŏng công nghệ, kỹ thuật, n'hao âk tơ̆ tâm pleh mông kan, leo ƀư khoa học rhuăt glêh mông nar ƀư, nsrôih ƀư lôch jêh ntung Rạch Miễu 2 tâm khay 10/2025 gay mbah rhơn Đại hội Đảng bộ n'gor Bến Tre, ơm 6 khay rđĭl đah rnoh ngăch ndơ̆ luh (khay 4/2026), đăp mpăn nâp uĕh, kỹ thuật, rup uĕh măt uănh, đăp mpăn pah kan, mât kloh uĕh ntŭk gŭ rêh, der bah n'hao tay tơm prăk, njrăng n'gang sa khâm, tih djơh, mpŭng lir, nkre mât ŭanh khlay nău rêh công nhân.