Ôi 5/8, Thủ tướng Chính phủ Phạm Minh Chính ƀư rơh hop Chính phủ way ăp khay khay 7. Tĭng nău mbơh, nô nău wăng sa rêh jêng kon nuĭh khay 7 geh trong rƀŏng hao uĕh tay, geh nău dơi uĕh rlău khay 6, kơp  nsum 7 khay uĕh rlău ndrel khay dja năm e nơh ta lĕ rngôch ăp trong kan. Ntoh lư lah pah kan rđău đă ƀĭt juet geh nău ơm gĭt kan âk lơn, lor nchrăp, ngăch ngăr, tâm di, grêt dêh ngăn ngăn lơn; Hun hao dơi ntrŭt ntrôl ta lĕ pe nkual công nghiệp, tuch tăm, rhŏ dŏng.

Ăp trong kan lơn âk lah bah jâng wăng sa rgâl uĕh tay; âk nkô̆ nău nchiăng khan dơi rgum droh rklaih; nău rêh jêng kon nuĭh dơi ăp tŏng đăp mpăn. N’glôch jêh rơh hop, Thủ tướng Phạm Minh Chính đă ăp gưl, ăp n’gâng kan, ăp n’gor ân tĭng ƀư ăp kôp tay, lĕ n’hâm suan ăp nău dơn kan, trong nkra ndơ̆ luh ăp trong kan đah nuih n’hâm: Nsrôih âk, nsrôih lĕ n’hâm suan he, dâk kan lĕ n’hâm suan, đăp mpăn geh nău tam, nsrôih tĭng ƀư geh nău dơi lam lĕ rngôch ăp rnoh tât kan, nău  dơn kan bah năm 2024; ntrôl dăng lơn đŏng n’gluh tơm prăk  ntuh kơl, 3 bôk nău kan gưl neh dak; rgum nkra dŭt bah ăp nkô̆ nău nchiăng khan, ntoch jong.