Ôi 10/1, tâm rơh pah kan ta n’gor Hải Dương, Thủ tướng Phạm Minh Chính khâl, pă nklâm ndơ an cán bộ, công nhân, nuĭh kan ta n’gor Hải Dương. Rgŏ jă n’hanh mbah rhơn tết công nhân n’hanh nuĭh kan ta Công ty TNHH Huyundai Kefico mpeh Tập đoàn Hyundai Hàn Quốc, Thủ tướng Phạm Minh Chính  lah uĕh nău rgop bah rmôt công nhân nuĭh kan lam dak hŏ rgop tâm nău dơi nsum bah neh dak.

Nkre lah kloh, năm 2023, Hải Dương hŏ dơi geh ăp rnoh tât ndơ̆ luh, tâm nău dơi nsum nê geh nău rgop bah cán bộ, công nhân ăp doanh nghiệp ta n’gor Hải Dương lah nsum n’hanh bah Công ty Kefico lah êng, Thủ tướng rhơn rnê Công ty Kefico uănh khlay công nhân n’hanh mpŏng công ty ndrel ăp doanh nghiệp nsrôih râng ăp nău kan đăp mpăn rêh jêng kon nuĭh, nău kan di luật pháp. Thủ tướng dăn đă, Đảng bộ, n’gâng kan, Mặt trận Tổ quốc, ăp nsum mpôl chính trị n’gor Hải Dương ƀư jăp tay pah kan đăp mpăn rêh jêng kon nuĭh, mât kloh uĕh ntŭk gŭ rêh, n’hao geh nău rêh drăp ndơ, nuih n’hâm  bah ƀon lan, ndơ̆ luh hao văn hoá tâm ban đah nău hun hao wăng sa- rêh jêng kon nuĭh./.