Ôi lơ 16/2, ta Bến Tre, Thủ tướng Phạm Minh Chính leo rơh pah kan đah nuĭh leo kan tơm n’gor Bến Tre gay ma uănh rnê năl nău geh hun hao wăng sa- rêh jêng năm 2022 n’hanh tâm mbơh, tâm nchră trong kan, nău kan năm 2023, doh rklaih ăp nău jêr jŏt, kŏ văk n’hanh doh rklaih ăp nău dăn đă gay ma kơl an Bến Tre hun hao ngăch, nâp nâl.

Ta rơh pah kan, Thủ tướng knơm an lah, đah nău mpŏng, trong kan hun hao tâm di, ndrel đah nău nsrôih, dơn kan bâh lĕ trong kan chính trị, nău tât râng nsrôih bâh ntŭk kan doanh nghiệp n’hanh ƀon lan lam n’gor, Bến Tre mbra n’hao nău tâm rnglăp, nău mĭn kan mhe, dâk ƀư tơm n’hanh hun hao têh dăng, ƀư jêng rơh ntơm nău kan mhe gay ma Bến Tre jêng n’gor hun hao sâm geh bâh nkual Đồng bằng sông cửu Long ta năm 2025 n’hanh bâh lĕ lam dak ta năm 2030. Mpeh ăp nău dăn đă bâh n’gor Bến Tre bâh ăp nău tâm rgop bâh nuĭh leo kan ăp n’gâng kan, ntŭk kan trung ương, Thủ tướng lĕ tâm ban ŭch đah nău doh rklaih ăp nău dăn đă bâh n’gor, bâh nău kan mât đăp mpăn di ăp nău ntrŭnh bâh pháp luật, njêng nău kan ntơm mbluh nău kan, rgum lĕ ăp rnoh kan an hun hao bâh n’gor.