Ta rơh rƀŭn nchră tal 12 rnâng kan ntĭm leo, Thủ tướng Phạm Minh Chính lĕ geh pă an 57 nău kan an ăp n’gâng kan, ntŭk kan, ăp ntŭk, tâm nĕ geh 11 nău kan geh năm ton.

Nkre lah, Thủ tướng Chính phủ, ăp groi Thủ tướng lĕ geh 12 văn bản ntĭm đă mbơh tơih ăp nău kan geh tât ăp nău nchrăp kan, nău kan. Thủ tướng an gĭt, geh du đê̆ nău kan dôl geh mbơh ƀư ê hŏ lôch, an geh nsrôih tay, nsrôih gay ma dơi geh du nău nchrăp kan ngluh mbơh, vơt rhơn Đại hội Đảng ăp gâl, mpŏng tât Đại hội Đảng lam dak tal 14, kahgĭt 80 năm nar njêng ngih dak, 50 năm nar rklaih đăp mpăn miền Nam dơn ngoăy neh dak. Thủ tướng Chính phủ đă ăp nuĭh kan ta rnâng kan ntĭm leo, ăp đại biểu râng rƀun nchră rgum uănh nđôi, uănh năl na nê̆ ăp nău kan geh pă jao n’hanh ntĭm đă, doh rklaih ăp nău jêr jŏt, kŏ văk, ntrôl ngăch mbơh tơih ăp nău nchrăp kan tâm let năp tay.