Tâm bôk nău kan hăn khâl na nê̆ Thổ Nhĩ Kỳ, ta thủ đô Ankara, Thủ tướng Chính phủ Phạm Minh Chính n’hanh I ur lĕ mâp cán bộ, nuĭh kan Đại sứ quán n’hanh nsum mpôl nuĭh Việt Nam ta Thổ Nhĩ Kỳ. Uănh lah prêh, mbah rhơn nău têh dăng bah nsum mpôl nuĭh Việt Nam ta Thổ Nhĩ Kỳ, Thủ tướng Chính phủ an gĭt lĕ đă mpeh Thổ Nhĩ Kỳ nta nơihg tay an nsum mpôl nuĭh Việt Nam gŭ rêh tay, pah kan ta Thổ Nhĩ Kỳ, rgum lăp jru hvi ta ntŭk gŭ, rgop dŭt n’hâm tâm nău hun hao bah Thổ Nhĩ Kỳ kơt tâm boh dăch dêh 2 dak n’hanh rƀŏng tât sĭt ƀon tơm, neh dak.

Thủ tướng Chính phủ mpŏng kônh wa đăp mpăn, nsing nơm tay tâm nău rđău bah Đảng n’hanh Ngih dak; Đại sứ quán ta Thổ Nhĩ Kỳ mât uĕh ƀư tơm khlay, dăch dêh nsum mpôl, ndâk njêng ntŭk gŭ rêh nar lơ đăp mpăn n’hanh hun hao; jêng ntung nthoi nâp nâl an tâm boh dăch dêh đah 2 dak n’hanh nuĭh ƀon lan 2 dak; mât nău uĕh rnoi nuĭh n’hanh ƀon tơm; ntĭm nti kon sau mpeh tu tơm bah nơm, mât uĕh nău ngơi rplay sam ƀŭt Việt.