Dơi tăng rơh n’gơ neh geh ta n’gor Ishikawa n’hanh nkual kiău ma miền Trung Nhật Bản, ƀư khuch têh mpeh nuĭh n’hanh drăp ndơ, lơ 2/1/2024, Thủ tướng Chính phủ Phạm Minh Chính lĕ kuăl điện ôp khâl tât Thủ tướng Nhật Bản Kishida Fumio. Rnoh nuĭh khĭt n’hanh sôt rmanh rơh n’gơ neh hô ngăn hao tay.

Ndrel đah rơh n’gơ neh geh rnoh têh 7,6 độ richter; 155 rơh n’gơ jêh nĕ ƀư khuch têh mpeh ndoh ndơ nkual ƀon têh n’hanh ƀư âk nău khuch ta nkual ƀon têh Wajima, n’gor Ishikawa. Ntoh ngơi ta rơh rƀŭn mbơh ndal ƀư ndrel nar, Thủ tướng Nhật Bản Fumio Kishida mĭn lah, khuch khat yor n’gơ neh ƀư lah “Ta rnoh dŭt têh”, chính phủ dak aơ mbra nsrôih ntrôl ngăch ăp nău ƀư wơt kơl du trong “lĕ rngôch”, tĭng nkô̆ nău rgŏ jă lĕ rngôch ăp rmôt, nkre đă kruanh ăp n’gâng kan, ngih pah kan geh tât hăn ta ntŭk gay ntop kơl rdêng ndoh ndơ n’hanh ăp nău ƀư ntop kơl êng.