Nar ntri (19/8), Thủ tướng Chính phủ Phạm Minh Chính râng Tâm nchră n’glôch jêh năm nti 2023 -2024 n’hanh an ƀư nău dơn kan năm nti 2024-2025 tă bah Bộ Giáo dục n’hanh Đào tạo ƀư tĭng trong pơk sŏng dăng đah bôk ƀoh tơm Hà Nội đah 63 n’gor, nkual ƀon têh mpeh Trung ương.

Ntơh măt Chính phủ, Thủ tướng Phạm Minh Chính nchih nkah, rnê âk, mpư rnê n’hanh mbah rhơn ăp nău hŏ dơi geh khlay bah n’gâng kan ntĭm nti tâm năm nti mhe aơ, rgop tâm nău dơi nsum bah neh dak tâm bah ri  aơ nơh. Mpeh du đêt nău dơn kan, trong nkra rgum tơm Thủ tướng đă Bộ Giáo dục – Đào tạo, ăp bộ, n’gâng kan, ăp n’gor tĭng nău dơi kan, nău dơn kan, n’glĕ nău dơi nkra bah he rgum an tĭng ƀư; ngăch mbơh gưl geh nău dơi kan đah ăp nkô̆ nău rlău nău dơi nkra bah he. Lơn lah nchrăp ăp dăp ăp ndơ dŏng an năm nti mhe; ƀư uĕh Lễ khai giảng nar 5/9 bơi tât, njêng mông nar khuh n’gôr rhơn mƀak, nuĭh n’hâm nđơr an năm nti  mhe, lơn lah n’hao săk blău rmôt nai ntĭm nti nar lơn ma uĕh, tŏng đah nău ŭch geh ngăn ngăn.