Ôi 10/3/2023 ta Hà Nội, Bộ Công an ƀư tâm nchră pơk sŏng dăng lam dak mpeh pah kan njrăng n'gang ma túy. Wa Phạm Minh Chính, Thủ tướng Chính phủ râng n'hanh rđău đă ta rơh tâm nchră. Lah ta rơh tâm nchră, Thủ tướng Chính phủ Phạm Minh Chính lah rjăp, nău tih ma túy hŏ n'hanh dôl jêng nău tât khuch bah ntil kon nuĭh. An tay nău tih doih ma túy lơh dŭt jru hô tât ăp nkual wăng sa, văn hoá, rêh jêng kon nuĭh, rnă njrăng- njrăng n'gang neh dak, ƀư khuch tât n'hâm suan bah du đêt nuĭh ƀon lan, nkre lah nkô̆ ƀư  ntoh luh ăp ntil nău tih, ntêt nkri tât nău đăp mpăn n'hanh rêh jêng bah ăp dak,  ăp rnoi nuĭh.

Ntơh măt Chính phủ, Thủ tướng rhơn rnê ăp  nău nsrôih, nău rgop; nkah gĭt ta năp ăp nău roh yot; n'hanh mbah rhơn ăp nău dơi ngăch prăl bah cán  bộ, tahen mpôl Công an ƀon lan, ăp gưl, ăp n'gâng kan tâm njrăng n'gang nuh tih ma túy tâm bah ri aơ, rgop khlay tâm nău dơi hun hao n'hanh đăp mpăn  lam rêh jêng kon nuĭh bah neh dak. Gay njêng rgâl dăng tâm pah kan njrăng n'gang ma túy, Thủ tướng đă, pah kan njrăng n'gang n'hanh mât kân ma túy ân way ƀư ta nâm nău rđău đă na nê̆ bah ăp gưl ủy Đảng, nău ŭanh khlay bah ăp n'gâng kan ăp gưl, tâm nê geh mpôl Công an ƀon lan lah n'gâng tơm.