Lơ 18/12, tâm rnôk hăn kan, râng rƀŭn gưl prêh di nkah 50 năm nar ndâk nau tâm boh ASEAN-Nhật Bản, Thủ tướng Chính phủ Phạm Minh Chính hŏ tâm nchră đah Kruanh Hạ viện Nakuga Fukushiro. Tâm rnôk tâm nchră, Thủ tướng Chính phủ Phạm Minh Chính ntoh nau rhơn bah năp nau hun hao rjăp, ăp ntil ndrel ngăn ngên bah nau tâm boh kan nsum Việt Nam-Nhật Bản. Tĭng nê, Nhật Bản lah dak kan mrô 1 mpeh ODA, tal 2 lah pah kan, tal pe lah ntuh kơl ndrel tal puăn lah nau kan tăch rgâl, lah rjăp Việt Nam mro uănh Nhật Bản lah dak kan nsum khlay bôk năp ndrel jŏ jong.

Thủ tướng Chính phủ Phạm Minh Chính đă Kruanh Nukaga Fukushiro ndrel Hạ viện Nhật Bản kơl an, kơl n’hao tâm boh tâm âk nau kan Việt Nam-Nhật Bản tĭng trong tâm boh mhe ƀư nau kan ăp ntil, n’hao nau tâm boh, tâm n’ur Quốc hội bar dak, n’hao nau tâm nchră gưl prêh, tâm n’ur đah ăp Nghị sĩ, Nghị sĩ mom, nghị sĩ bu ur bah 2 dak. Kơl an ndrel ntrŭt dăng nau tâm nthoi 2 jâng văng sa, kơl an Việt Nam ndâk nau văng sa êng, nâp nâl./.