Kêng măng 20/11, Thủ tướng Chính phủ Phạm Minh Chính hŏ wơt Bộ trưởng Bộ wăng sa, Doanh nghiệp n’hanh pâl nđaih Romania Stefan-Radu Oprea. Thủ tướng Chính phủ an gĭt, Việt Nam way uănh khlay tâm boh way ơm đah Romania; rnê âk Romania hŏ kơl Việt Nam tâm rơh rlăch ndăng nsĭt geh đăp mpăn, dơn ngoăy neh dak ntơm nơh tâm ban kơt rdâk njêng n’hanh hun hao neh dak aƀaơ.

Thủ tướng Phạm Minh Chính n’hanh Bộ trưởng Stefan-Radu Oprea rhơn saơ tâm boh bar ding Việt Nam-Romania dôl hun hao uĕh lăng ta âk trong kan chính trị, tâm boh dak bah dih, wăng sa, rnă njrăng, njrăng n’gang neh dak, văn hóa, ntĭm nti. Let năp tay, ndrel đah nău n’hao âk rơh tâm khâl gưl têh n’hanh ăp gưl, ta lĕ rngôch ăp trong kan, Thủ tướng Phạm Minh Chính dăn đă bar ding ân ntrŏng tâm boh wăng sa- ntuh kơl, tăch rgâl lah n’gâng tơm khlay tâm boh bar ding let năp tay, di đah tâm boh chính trị, tâm boh tâm brê. Bar ding ân n’hao dăng buăt nthoi nchuăn rdeng, tâm nê geh rdeng trong trôk; ndăn geh nău tam Hiệp định EVFTA.