Kêng măng 6/8, ta Ngih Chính phủ, Thủ tướng Phạm Minh Chính wơt Kruanh N’gâng kan mât njrăng bri dak Nhật Bản Kihara Minoru dôl khâl na nê̆ Việt Nam. Thủ tướng Phạm Minh Chính lah rjăp Việt Nam ŭch ƀư tĭng nău kan tâm rnglăp nchră nău bah dih đăp mpăn, ƀư tơm, tâm rgop âk trong, tâm rgop âk ntil, lah băl, dak nsing nơm, lah nuĭh geh lĕ đah nău kan bah nsum mpôl lam ntŭr neh yor nău ŭch đăp mpăn, kan ndrel hun hao ta nkual n’hanh ta lam ntŭr neh; uănh khlay n’hanh mpŏng ndrel

Nhật Bản mbơh ƀư ngăn ngên n’hanh săk rnglăy tâm boh kan ndrel têh hvi lĕ rngôch yor đăp mpăn n’hanh uĕh lăng ta châu Á n’hanh lam ntŭr neh. Ta rơh wơt, 2 ding lĕ tâm nchră mpeh nu nău lam ntŭr neh n’hanh nkual. 2 ding lah rjăp nău khlay bah đăp mpăn rnă njrăng, dah rŏng trong mpăr, trong dak lêng ta Biển Đông, mkra ăp nău tâm pit đah trong đăp mpăn tĭng nkô̆ nău luật pháp lam ntŭr neh, ngăn lah Hiến chương Liên hợp quốc n’hanh Công ước bah Liên hợp quốc mpeh Luật Dak lêng (UNCLOS) năm 1982.