Kêng măng 01/3, ta Nhih pah kan Chính phủ, Thủ tướng Chính phủ Phạm Minh Chính hŏ wơt wa Olivier Becht, Bộ trưởng Mât uănh tăch rgâl dak bah dih, wăch rgum wăng sa n'hanh nuĭh Pháp gŭ ta dak bah dih. Bar ding nchih nkah ăp nău dơi geh wăng sa tâm boh tâm bah ri aơ, lơn lah tăch rgâl bar dak hun hao tay dăng, geh 5,3 rmen đôlar   năm 2022, hao 10% rđĭl đah năm 2021.

Thủ tướng Chính phủ Phạm Minh Chính dăn đă Pháp nta trong dơh an ndơ tăch n'gluh bah Việt Nam, lơn lah ndơ tuch tăm tăm ka Việt Nam tât đah ntŭk tăch rgâl Pháp; ŭch rŏng bar ding tâm boh lhăt tay, ndăn ăp trong dơh bah Hiệp định Dah rŏng tăch rgâl Việt Nam - EU gay n'hao dăng tâm rsong tăch rgâl bar ding. Nkhêp geh rnôk dja, Thủ tướng Chính phủ dăn đă Pháp ơm uănh an dŏng Hiệp định mât njrăng ntuh kơl Việt Nam  – EU gay nta trong dơh an tâm boh ntuh kơl geh nău tâm ban, ndrel nsĭt geh đah bar dak; ntrŭt ntrôl Ủy ban châu Âu ơm ntlơi thẻ vàng IUU đah ndơ tui ka Việt Nam, tŏng đah nău ŭch geh nuĭh dŏng ndơ Pháp n'hanh EU tâm ban kơt đăp mpăn rêh jêng an hang rhiăng nuĭh kan tâm n'gâng kan tui ka Việt Nam.