Ôi 14/8, ta Nhih pah kan Trung ương Đảng, ta nâm nău ƀư tơm bah Tổng Bí thư, Kruanh dak Tô Lâm, Kruanh Ban rđău đă, hŏ ƀư rơh hop tâl 26 Ban rđău đă Trung ương mpeh njrăng n’gang sa khâm tih djơh. Rơh hop hŏ tâm nchră an nău rgop mpeh mbơh nô nău, lôch jêh tĭng ƀư pah kan 6 khay bôk năm 2024 n’hanh nău dơn kan rgum tơm 6 khay kêng dŭt năm 2024; mbơh n’glôch jêh rđău đă, nkra ăp nău tih mpeh săk Ban rđău đă tĭng groi nđôi, nchŏng đă lôch  rơh hop tâl 25 bah Ban rđău đă tât aƀaơ; n’hanh mbơh lôch jêh nău kan bah Ban rđău đă njrăng, n’gang sa khâm, tih djơh gưl n’gor 6 khay bôk năm 2024.

 Lah ta rơh hop, Tổng Bí thư, Kruanh dak Tô Lâm –Kruanh Ban rđău đă đă ăp gưl ủy, mpôl kan đảng, nhih pah kan dơi kan mô dơi uănh lhơ, di nuih n’hâm đah ăp nău dơi hŏ geh, ma ân tĭng ƀư dăng tay, ăp kôp ăp trong nkra, rôih sŏng, mô dĭl r’al  tâm rlăch ndăng njrăng n’gang sa khâm, tih djơh tĭng di trong rƀŏng “mô gu rlu, mô geh  nkual mpăng, mô geh mha êng, bol nê lah moh nuĭh; ƀoi tĭng du nău tih, nkah njrăng lĕ ma du nkual, lĕ ma n’gâng kan”. Tổng Bí thư, Kruanh dak Tô Lâm êng lah rjăp 3 nău đă: Njrăng n’gang sa khâm tih djơh ân rhŏ dŏng hun hao wăng sa- rêh jêng kon nuĭh; ân ƀư tât ntŭk kan đảng tâm dâng, chi bộ, ân groi nđôi ngăn bah cán bộ, đảng viên n’hanh ƀon lan...