Ôi ntri (15/8) ta Nhih pah kan Trung ương Đảng, nkah ndray 79 năm nar Cách mạng khay pham n’hanh Quốc khánh dak Cộng hòa xã hội chủ nghĩa Việt Nam 2/9, Bộ Chính trị ƀư tâm nchră mâp măt ăp kruanh rđău kan, kruanh rđău kan ơm Đảng, Ngih dak gay mbơh gĭt mpeh nô nău bah Đảng, bah neh dak tâm ăp khay bôk năm 2024, nău dơn kan rgum tơm ăp khay kêng dŭt năm 2024 n’hanh let năp tay.

Lah ta rnôk tâm nchră, ntơh măt ăp kruanh rđău kan Đảng, Ngih dak, Tổng Bí thư, Kruanh dak Tô Lâm lah uĕh ăp kruanh rđău kan, kruanh rđău kan ơm Đảng, Ngih dak, Mặt trận Tổ quốc Việt Nam râng rơh mâp măt dêh bên dja; dăn njuăl tât ăp kruanh rđău kan ơm ndrel rnăk wâl n’hâm suan ngăch dăng, rhơn răm n’hanh ăp ntil nău uĕh lăng. Tổng Bí thư, Kruanh dak Tô Lâm lah rjăp, Bộ Chính trị, Ban Bí thư dôl rgum rđău đă lĕ n’hâm suan, đăp mpăn, đăt ndal, hao ngăch, ơm tât tĭng ƀư geh ăp dơi ăp rnoh tât kan, ăp trong kan, nău dơn kan ma Nghị quyết Đại hội 13 bah Đảng hŏ ndơ̆ luh; an lor droh rklaih jêr jŏt kŏ kol mpeh trong tĭng, nta trong dơh an ăp nău kan ngăn tâm trôm pháp luật, rgop rdâk njêng neh dak, n’hao nău rêh ƀon lan bah mpôl kan, ăp nuĭh doanh nghiệp tâm n’hanh bah dih dak.