Kêng măng ntri (21/8), ta Văn phòng Trung ương Đảng, Bộ Chính trị ƀư mbơh nău n’glêh an mpeh tâm pă, ntăm n’hao Kruanh Ban Kinh tế Trung ương n’hanh Kruanh Ban Dân vận Trung ương. Ndơ̆ siƀŭt n’glêh an n’hanh lah ta rơh lễ, Tổng Bí thư, Kruanh dak Tô Lâm  mbah rhơn bar cán bộ mhe dơi Bộ Chính trị nsing nơm tâm pă kan, ntăm n’hao, jao nău kan mhe: wa Trần Lưu Quang ƀư Kruanh Ban Kinh tế Trung ương n’hanh wa Mai Văn Chính ƀư Kruanh Ban Dân vận Trung ương.

Tổng Bí thư, Kruanh dak Tô Lâm lah rjăp, wa Trần Lưu Quang n’hanh  Mai Văn Chính lah cán bộ kruanh rđău kan dơi ntĭm nti ăp tŏng rêng, hao bah tâm  dâng, rlău âk ntŭk gŭ pah kan, râng âk khóa Trung ương, geh nău tă ơm gĭt kan ngăn ngăn n’hanh nău ơm gĭt kan tâm pah kan nsŏng kơl, rđău đă, geh âk nău dơi khlay ta ăp trong kan tâm pă mât bôk kan. Lah ta rnôk lôch n’glêh an, wa Trần Lưu Quang n’hanh Mai Văn Chính lah rjăp, aơ lah nău rhơn n’hao n’hanh lah nău dơn kan mhâm ƀư gay ndrel nsum mpôl Ban wat jêh nău kan dơi jao đah du rnoh nău kan dŭt âk bah meng mper lăp Đại hội XIV bah Đảng. wa Trần Lưu Quang n’hanh Mai Văn Chính ŭch rŏng, ta nău kan mhe lah Kruanh Ban Kinh tế Trung ương n’hanh Kruanh Ban Dân vận Trung ương mbra dơi Đảng, Ngih dak, kruanh rđău kan n’hanh cán bộ đảng viên ăp nhih pah kan Trung ương Đảng uănh khlay, ntop kơl, tâm boh lhăt gay ndrel nsum mpôl Ban wat jêh ngăch prăl nău dơn kan kalơ ntŭk kan mhe.