Tâm rnôk hăn khâl gưl ngih dak tât Trung Quốc, kêng măng ntri 19/8, ta Jay năch Điếu Ngư Đài, Bắc Kinh, Tổng Bí thư, Kruanh dak Tô Lâm hŏ ôp srĭng nău Thủ tướng Quốc vụ viện Trung Quốc Lý Cường. Ta rơh ôp srĭng nău, Tổng Bí thư, Kruanh dak Tô Lâm lah rjăp Việt Nam way ŭanh hun hao  tâm boh tâm kâng n’har, tâm boh lam lĕ rngôch đah Trung Quốc lah trong nchrăp mô rgâl, lah trong sơch  têh jong, an ƀư lor bôk năp tâm gung trong tâm boh dak bah dih êng he, âk ding, âk ntil bah Việt Nam.

Thủ tướng Lý Cường dăn đă bar ding n’hao dăng tay tâm boh tâm kâng n’har, tâm rnglăp, ntrôl dăng nău kan tâm nđŭr ƀon lan n’hanh rơh mom ndăm bar dak; an ƀư ăp trong nchrăp gŭ rêh ƀon lan n’hanh tâm boh tâm trong kan  ntĭm nti nău kan, ntik uĕh nău khlay kan bah Cung Hữu nghị Việt - Trung; lah rjăp nău rôih tĭng trong âk ding ngăn ngăn n’hanh trong tĭng nkual pơk hvi, nchrăp n’hao dăng tâm boh ta ăp rgum nchră âk ding. Bar ding tâm ôp mpeh nkô̆ nău dak bah dih, nkual ndrel uănh khlay đŏng, tâm ban ŭch ndrel mât kân n’hanh nkra tâm di nău tâm rkeh, mât đăp mpăn, bah tâm lơh tâm su ta dak lêng, rdâk tay ntŭk gŭ rêh soih uĕh an nău hun hao bah bar dak.