Dơn nău jă bah Tổng Bí thư Nguyễn Phú Trọng, lơ 12/12, Tổng Bí thư Đảng Cộng sản Trung Quốc, Kruanh dak Cộng hòa nhân dân Trung Hoa Tập Cận Bình n’hanh I ur lĕ tât Hà Nội, ntơm rơh khâl gưl ngih dak tât dak he tâm 2 nar. Kêng măng nđaơ, ta Ntŭk Kruanh dak, Tổng Bí thư Nguyễn Phú Trọng lĕ ƀư tơm wơt Tổng Bí thư, Kruanh dak Trung Quốc Tập Cận Bình ƀư tĭng gưl prêh an nuĭh kruanh ngih dak. Jêh nĕ, 2 nuĭh kruanh ntơm rgum nchră, ndrel uănh tay rnôk hun hao tâm boh 2 Đảng, 2 dak, tâm ban ŭch an lah nău dăch dêh way ơm nkre lah đồng chí, nkre lah oh nô yor Kruanh Hồ Chí Minh, Kruanh Mao Trạch Đông ndrel ăp nuĭh kruanh bôk năp ndâk njêng n’hanh rgum mât lah drăp ndơ khlay bah nuĭh ƀon lan 2 dak, an mô rlu ndơn n’hanh mât uĕh.

2 ding tâm ban ŭch ndâk njêng nsum mpôl nkoch nău rgŏ năp Việt Nam-Trung Quốc geh nkô̆ nău khlay, nsrôih yor nău uĕh lăng bah nuĭh ƀon lan 2 dak, yor đăp mpăn n’hanh hao ngăch kon nuĭh, tâm di đah Hiến chương Liên hợp quốc n’hanh luật pháp lam ntŭr neh, tĭng nău way tâm ryơk ndrel, kan ndrel tâm ban nău geh nsum, tâm ryơk đăp mpăn, ƀư tơm n’hanh uĕh lăng neh ntu ndrel, nsrôih mkra nău tâm rkeh tă bah trong đăp mpăn. Jêh rgum nchră gưl prêh, 2 đồng chí Tổng Bí thư lĕ ndrel uănh n’hanh djăt nău nkoch mpeh 36 sam ƀŭt tâm ton kan ndrel ta âk ntil dơi ký ton.

Tổng Bí thư Nguyễn Phú Trọng jă n’hanh ndrel Tổng Bí thư, Kruanh dak Trung Quốc Tập Cận Bình râng ngêt trà. 2 Tổng Bí thư djăt nkoch mpeh ăp ndơ trà ntoh lư bah Việt Nam n’hanh ƀư ngêt trà uĕh bah nuĭh Việt, nkre mpơl nău uĕh tâm ban mpeh văn hóa đah 2 rnoi nuĭh. Măng ndrel nar, Tổng Bí thư Nguyễn Phú Trọng n’hanh I ur, Kruanh dak Võ Văn Thưởng n’hanh I ur lĕ ƀư ngêt sông mbah rhơn Tổng Bí thư, Kruanh dak Trung Quốc Tập Cận Bình n’hanh I ur khâl gưl ngih dak tât Việt Nam.