Kêng măng aơ, ta Nhih pah kan kruanh dak, Tổng Bí thư Nguyễn Phú Trọng ƀư tơm rơh lễ wơt ngăn Tổng Bí thư, Kruanh dak Trung Quốc Tập Cận Bình, lôch nê, bar kruanh rđău kan ƀư tâm nchră. Hăn khâl gưl ngih dak tât Việt Nam bah Tổng Bí thư, Kruanh dak Trung Quốc Tập Cận Bình ndrel I ur n’hanh mpôl ntơh măt gưl têh Đảng, Ngih dak Trung Quốc n’gluh âk nău mpŏng mhe tâm boh bar dak. Nê lah nău mpŏng mpeh du “Ntŭk mpơl mhe”, “Gưl têh mhe” bah tâm boh Việt Nam-Trung Quốc. Ta rơh tâm nchră, bar ding ndrel tâm nchră mpeh nău n’hao gưl mpơl săk mhe an tâm boh bar ding, ntrŭt ntrôl tâm boh têh jong lam lĕ rngôch đah bar dak lăp tâng jru n’hanh ngăn ngăn lơn.

Tâm 20 năm aơ, Trung Quốc lah dak băl tâm boh tăch rgâl dŭt têh bah Việt Nam n’hanh aƀaơ Việt Nam lah dak tâm boh tăch rgâl dŭt têh bah Trung Quốc tâm ASEAN, dak tâm boh tăch rgâl têh tâl 4 bah Trung Quốc lam ntŭr neh (bah kơi Mỹ, Nhật Bản, Hàn Quốc). Nsĭt geh tăch rgâl bar ding hao 9 tơ̆ ntơm bah 20 rmen USD năm 2008 hao bơi 180 rmen USD năm 2022. Rlău 15 năm, ntuh kơl bah Trung Quốc tâm Việt Nam hao rlău 10 tơ̆ ntơm bah 2 rmen USD tâm năm 2008 hao 25 rmen USD aƀaơ. Ntŭk chrat ang đŏng tâm boh Việt Nam-Trung Quốc lah tâm nđŭr ƀon lan n’hanh tâm boh đah ăp n’gor. Tât aƀaơ, hŏ geh bơi 60 n’gor/nkual ƀon têh bah Việt Nam njêng tâm boh tâm rnglăp đah ăp n’gor Trung Quốc. Tâm 10 khay năm aơ, Việt Nam hŏ wơt 1,3 rkeh tơ̆ năch Trung Quốc. nău kan nsum tâm rgâl, tâm boh đah Việt Nam - Trung Quốc tâm ăp nău kan nsum bah nkual n’hanh lam ntŭr neh mô rlu dơi n’hao têh./.