Đah 80 năm deh, 57 năm Đảng, 18 năm mbro ƀư kruanh n’gâng tơm bah Đảng, Ngih dak, Tổng bí thư Nguyễn Phú Trọng hŏ geh ăp n’hâm suan nău gĭt blău dŭt ngăch prăl mha êng đah n’gâng kan bah Đảng n’hanh bah rnoi nuĭh he. Dơi tôp srŏng  tâm nău rêh cách mạng, đah trong uănh têh jong, nău mĭn sôt hơr, nkrêp jĭr lhăt đah lý luận đah n’glôch jêh ngăn ngăn, Tổng Bí thư Nguyễn Phú Trọng hŏ nđơn tay ngăch prăl nău mĭn, nuih n’hâm uĕh lŏng, trong gŭ rêh n’hanh gung trong cách mạng bah Kruanh Hồ Chí Minh, rdâk njêng neh dak he “Mô hŏ tă geh n’gâng kan têh kuâng, săk geh, nsing nơm n’hanh ring tam têh khlay dak bah dih kơt aƀaơ”.

Tâm rnoh ăp nău rgop bah Tổng bí thư Nguyễn Phú Trọng ma ntoh lư lah rơh rlăch ndăng njrăng n’gang sa khâm, tih djơh mô lah nău kan rdâk njêng, ƀư jêng ngăn ngăn ăp nău way, quy định tâm Đảng hŏ rgop têh kuâng, nkra ăp ntul rlong, jêr jŏt bah neh dak tâm rơh hun hao mhe.

“Rơh su ŭnh nuh” hŏ  jêng du nău lah way bên tâm nău lư lam rêh jêng kon nuĭh  ăp rnôk nkah tât pah kan njrăng n’gang sa khâm tih djơh tă bah Đảng he ntơm leo n’hanh Tổng bí thư Nguyễn Phú Trọng rđău đă na nê̆ bah năm kan Đại hội 11 tât aƀaơ.

PGS, TS Lê Văn Cường, Groi viện trưởng Viện rdâk njêng Đảng, Học viện Chính trị Quốc gia Hồ Chí Minh mô chuêl truh dak măt bah Tổng bí thư Nguyễn Phú Trọng tâm rơh mpôch dŭt tâm nchră Trung ương 6 khóa 11, nar 15 khay 10 năm 2012. Nê lah luh dak măt rngot ji bah du hê nuĭh dơn kan chính trị dŭt têh bah năp Đảng, bah năp ƀon lan rnôk “Mô đêt cán bộ, đảng viên” hŏ ƀong gor, rgâl jêng djơh săk. Truh dak măt nê hŏ jêng suan dăng rgum, ƀư jêng nău nsrôih bah lam Đảng, lam ƀon lan tâm rơh rlăch ndăng njrăng n’gang sa khâm, tih djơh:

“Rnôk rgŏ jă rơh rlăch ndăng njrăng n’gang sa khâm tih djơh ri Tổng bí thư Nguyễn Phú Trọng hŏ grĭch, grĭch luh dak măt. Ndơ lơh? Yor Tổng bí thư hŏ lah hôm, he lơh sa khâm tih djơh lah tâm ban ma he lơh tâm săk he nơm, saơ rngot ji ngăn, mô ŭch rlăch ndăng đah ndrăng băl, ndrel kan bah he, mô geh nuĭh ŭch rmal. Ndrăng băl ndrel kan bah he hŏ lăn geh tih ri he ân rôih rmal dơm, mô geh nkual mpăng, mô geh nău mha êng bah dih, bol nê lah moh nuĭh. Ta aơ, nău rngot ji bah Tổng bí thư geh suan rgu n’gơ, geh suan rêng lam, ƀư he mô plơ̆ rŭch, mô yuh yân yâng chuat, yơn mô dơi uănh lhơ, dơh lhoi đŏng. Geh kơt nê ri mơ di đah nău dơn kan ma Đảng n’hanh ƀon lan hŏ jao an.

Mât bôk kan na nê̆ “Tổng Tư lệnh”- Kruanh ban rđău đă, Tổng Bí thư Nguyễn Phú Trọng hŏ ndrel ƀon lan lăp tâm rơh rdâng lơh njrăng n’gang sa khâm đah  nuih n’hâm mô rong an dơm, mô geh nkual mpăng, mô geh mha êng. Dơn kơp êng ntơm bah bôk năm kan Đại hội 13 tât aƀaơ, Ban Chấp hành Trung ương, Bộ Chính trị, Ban Bí thư hŏ rmal 44 mpôl kan đảng n’hanh 164 đảng viên, tâm nê geh 13 Ủy viên Ban Chấp hành Trung ương, 17 Ủy viên Ban Chấp hành Trung ương ơm n’hanh 19 sỹ quan gưl tướng tâm mpôl tahen công an; 19 Ủy viên ban chấp hành Trung ương n’hanh Ủy viên Bộ chính trị dơi đă rlu kan. Ngăn geh dja kơt nău bah Tổng bí thư Nguyễn Phú Trọng- bol “dŭt rngot ji” yơn hŏ rgop rdâk tay nău nsing nơm bah ƀon lan đah nău rđău kan bah Đảng:

“Rơh rlăch ndăng sa khâm tă bah Đảng he rđău đă mât bôk lah Tổng Bí thư Nguyễn Phú Trọng dơi ƀư dŭt ăp tŏng rêng, dŭt geh ntŭk nsing. He hŏ rôih rnŏng, mô dĭl r’êl, hŏ rgŏ jă rơh rlăch ndăng rdâng lơh tih djơh sa khâm dja jru hvi tâm lam ƀon lan. Gâp mĭn lah, đah trong rƀŏng aƀaơ rơh rlăch ndăng rdâng lơh tih djơh sa khâm Việt Nam ta nâm nău rđău kan Đảng mô dơi rlơ̆ rlơt tay đŏng ôh".

Mô dơn ma ăp nău dâk kan ngăn ngăn, rơh njrăng n’gang sa khâm, tih djơh hôm dơi Tổng bí thư Nguyễn Phú Trọng nkrum lam jêng lý luận ma ăp nău nchih “Rôih rnŏng, mô dĭl r’êl rlăch ndăng, rdâng lơh sa khâm, tih djơh, rgop rdâk njêng Đảng n’hanh Ngih dak he nar lơn ma kloh uĕh, nâp dăng”. PGS.TS Vũ Tình, Groi Hiệu trưởng ơm nhih nti Đại học Khoa học Xã hội n’hanh Nhân văn, Đại học Quốc gia nkual ƀon têh Hồ Chí Minh lah rjăp, ndrôm siƀŭt lah "Ndơ pơk khlay" an ăp nuĭh ƀư pah kan njrăng n’gang sa khâm, tih djơh:

“Rơh kơn mom ndăm ân gĭt dơi he ân kơi năp nti nău blău kan, suan chŏl bah he mhâm dah tâm rnôk  ăp bu êh rkeh joi trong lơh chrai pah kan njrăng n’gang sa khâm n’hanh tih djơh. Ma ndrôm siƀŭt dja, rơh kơn mom ndăm gĭt kloh lơn nău dơn kan bah he đah neh dak, đah rnoi nuĭh, âk tiăr nti, kơi năp  nău gĭt blău mhâm ƀư gay di lah ăp nuĭh dôl n’hanh mbra lah nuĭh tơm mât neh dak let năp tay”.

Ta nâm nău rđău đă bah Tổng bí thư Nguyễn Phú Trọng, pah kan njrăng n’gang sa khâm, tih djơh dơi ƀư ndrel đah pah kan cán bộ. Đah nău ŭch nkre mât lhăt nău way neh dak, nkre mpơl kloh nău rŏng kon nuĭh; bah năm kan Đại hội 11 tât aƀaơ, Đảng he hŏ n’gluh an dŏng âk quy định na nê̆. Tâm nê, nău “an rlu”, “dŭt bah nău kan”  dơi quy định ta Quy định mbrô 41 nar 3/11/2021 bah Bộ Chính trị khóa 13 lah ngoăy tâm  ăp nău nkah ntoh lư, geh nău đăt ndal tâm nău nkrêp lhăt đah kơt nti, ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh đah pah kan rdâk njêng, rtŭt rmăn glêh tam Đảng:

Giáo sư, Tiến sĩ Tạ Ngọc Tấn, Ủy viên Trung ương Đảng ơm, Groi kruanh rnâng kan Hội đồng lý luận Trung ương lah rjăp, mô hŏ tă geh Đảng he geh rêng siƀŭt ăp kôp n’hanh lam lĕ rngôch geh tât pah kan cán bộ kơt aƀaơ. Nău dơi geh nê lah nău n’groh an lĕ nuih n’hâm, nău dơn kan bah Tổng bí thư Nguyễn Phú Trọng tâm bơi 3 năm kan:

“Tâm ăp nău uănh năl n’glôch jêh bah ăp rơh Đại hội ri ăp siƀŭt mbơh chính trị lah rjăp da dê tât ntŭk rbăn lhơ lah trong leo tĭng ƀư. Ma ŭch tĭng ƀư jăp ri ân geh du trong tĭng lam lĕ rngôch. Ban Chấp hành Trung ương ta nâm nău rđău kan bah Tổng bí thư Nguyễn Phú Trọng hŏ ƀư wat jêh ăp quy định, ăp nău n’găp, ăp trong rnŏng tâm nău kan bah Đảng, bah nău way ƀư, trong ƀư pah kan bah ăp gưl ủy, an tât ăp leo ƀư nău kan, tâm boh đah nhih pah kan…gay ƀư lôch jêh ăp tŏng trong tĭng tâm nău kan bah Đảng. n’hanh rnôk he geh du trong tĭng ăp tŏng, tâm di,  ăp tŏng nău lư n’hanh tŏng geh nău tam ri rnôk nê păng mbra geh nău kan dŭt khlay tâm nău n’hao dăng nău khlay rđău kan bah Đảng, n’hao nău dơi tam rđău kan n’hanh mât bôk kan bah Đảng”.

Đah ăp nău rgop mha êng an n’gâng kan rdâk njêng cách mạng bah Đảng, mô lăn ir gay lah, Tổng bí thư Nguyễn Phú Trọng lah kon nuĭh deh luh gay nkra ăp jêr jŏt, ntul rlong tâm du lvang bah lịch sử neh dak.

Dăn dŭt jêh nău nchih ma ăp nău nkoch êng rngot yô̆ bah Tổng bí thư rnôk hôm nha rêh. Rnôk ăp tơ̆ ŭch ntơh nău an nuih n’hâm he, wa way nkah tay, ntĭt bar pe nău lah jru hơr bah nuĭh ntoh lư Pa-ven Kốp-cha-gin tâm nău nchih ntoh lư “Loih hŏ srŏng kơt nê hôm" bah nhà văn Liên Xô Nhi-cô-lai Ốt-xtơrốp-xki. Nê lah nău uĕh di ma Tổng bí thư Nguyễn Phú Trọng hŏ tĭng du bông nău rêh:      

“Nău dŭt khlay bah kon nuĭh lah nău rêh n’hanh nău lư uĕh rêh, yor kon nuĭh dơn rêh du tơ̆ dơm. Ân rêh mhâm ƀư an bah n’huach n’huai, wơl wơh yor ăp năm khay hŏ rêh mbro, rêh mpŭng lir; gay bah ji đit prêng yor ăp nău kan mphar, djơh, geh ăp nuĭh mưch rmot; gay tât rnôk nhêp măt rok ti, he mbra n’hao êng săk an lah: Lĕ du bông nău rêh he, lĕ n’hâm suan he, he hŏ n’hơr an n’gâng kan dŭt têh khlay ta nău rêh- n’gâng kan rlăch ndăng rklaih luh rnoi nuĭh, rklaih luh kon nuĭh nsĭt tay nău  rhơn răm an ƀon lan!