Ôi 25/12, ta Hà Nội, Tổng Bí thư Nguyễn Phú Trọng, Bí thư Quân uỷ Trung ương ƀư tơm rơh hop tâl 8 tâm nchră Quân uỷ Trung ương. Ta tâm nchră,  đah nuih n’hâm sŏng dăng, uănh khlay nău dơn kan, ăp đại biểu rgum tâm nchră, uănh năl jêh geh rđău  đă tĭng ƀư nău dơn kan tahen, njrăng n’gang neh dak n’hanh rdâk njêng Đảng bộ Quân đội năm 2023, rđău đă lam tahen nkra bah jêr jŏt, ƀư lôch jêh ăp nău dơn kan đah lôch jêh âk rlău năm 2022, âk nău dơn kan ƀư lôch jêh ngăch prăl.

Nsing ta nău rblang uănh jru nô nău ta nkual, lam ntŭr neh, tâm dak, Quân ủy trung ương ntrŏng du đêt nău kan, trong nkra rgum tơm rđău đă, tĭng ƀư geh nău dơi nău  dơn kan tahen njrăng n’gang neh dak. Tâm nê, lor nchrăp rƀah gĭt tay, uănh năl, nchroh di nô nău, năn ngăch nsŏng kơl đah Đảng, Ngih dak nkra geh nău dơi ăp nău tât ndal, mô an geh ndrât ndal, mât njrăng nâp đăp mpăn, ƀư tơm, dơn ngoăy, lam lĕ rngôch neh dak. Ntik uĕh nău khlay kan n’gâng tơm tâm rdâk njêng njrăng n’gang neh dak lam ƀon lan; nkre đah njrăng n’gang neh dak nkre đah wăng sa, wăng sa nkre đah njrăng n’gang neh dak n’hanh bôk nău kan bah Chính phủ mpeh hun hao wăng sa- rêh jêng kon nuĭh, đăp mpăn njrăng n’gang neh dak, rnă njrăng ăp nkual n’hanh ntŭk rgum tơm; rgum rđău đă rdâk  njêng Đảng bộ Quân đội nâp dăng./.