Ôi ntri (12/8), ta Jay Quốc hội, ta nâm nău ƀư tơm bah kruanh Quốc hội Trần Thanh Mẫn, Ủy ban Thường vụ Quốc hội ƀư rơh hop way nkô̆ pháp luật khay 8, an nău rgop tâm 10 trong nchrăp Luật.

Ntơm pơk rơh hop, Kruanh Quốc hội Trần Thanh Mẫn lah kloh: 10 trong nchrăp luật dơi an nău rgop ta rơh hop dja mpeh âk trong kan dơi nău lư lam rêh jêng kon nuĭh êng uănh khlay, kơt Luật Công đoàn (rgâl nkra); Luật sŏk soăy ntop n’hao tay (rgâl nkra); Luật di sản văn hóa (rgâl nkra), Luật dăp rgum đô thị n’hanh dăp rgum thôn ƀon, Luật njrăng n’gang, puh n’hât ŭnh sa n’hanh kơl nuĭh. Kruanh Quốc hội êng lah rjăp, Bộ Chính trị mhe n’gluh an dŏng Quy định 178 mpeh mât kân nău dơi  kan njrăng, n’gang sa khâm, tih djơh tâm pah kan rdâk njêng pháp luật, đă ăp nuĭh kan tâm Ủy ban Thường vụ Quốc hội mpơl kloh nău mĭn, sŏng di, mô der ăp nkô̆ dơh geh tât nde sa trong kơl. Nkre an gĭt bôk năm 2025 mbra ƀư rgum nchră pháp luật, gay nchră jru lơn, ăp dăp lơn gay n’hao săk tam, lăp tâng jru tâm pah kan rdâk njêng pháp luật.