Ta ntŭk kan ntoh nau ngơi bah neh dak 58 Quán sứ, Hà Nội, Rmôt kan bah Uỷ ban văn hoá ntĭm nti bah Quốc hội hŏ geh nar pah kan đah Radio Việt Nam. Tâm nar pah kan, rđau kan ăp ntŭk bah Radio nkoch mbơh ăp nau kan nkoch trêng bah VOV, ăp nau jêr tâm rnôk rƀŏng tât nau ƀư tơm mpeh tơm prăk bah VOV tĭng nau ntrŭnh 60 bah Chính phủ, nau jêr tâm ntrong kan rnôk ƀư n’huch nŭih kan tĭng nau ntrŭnh, nau ân đă dŏng kan bah ntŭk kan báo chí tâm rnôk aƀaơ, rnôk tơm prăk ngih dak n’huch ri nau rêh bah cán bộ nŭih kan lơn ma jêr. Nkre đă ăp nau kan gay doh rklaih tâm rơh tât.

Ăp nŭih kan bah Uỷ ban Văn hoá ntĭm nti bah Quốc hội rnê lah: VOV lah ngoai tâm 6 ntŭk kan báo chí tơm ngăn bah dak nơm, rnôk aơ dôl rdâng đah âk nau jêr, nau ntul rlong mpeh nau kan nkoch mbơh geh nau ntrơn bah nau ƀư. Ngăn lah ăp nau jêr mpeh nau kan, nau ntrŭnh ndrel nŭih kan. Uỷ ban Văn hoá ntĭm nti bah Quốc hội mra tâm rgop đah VOV đă ăp nau kan mhe, ngăn lah nau kan tâm Luật báo chí (rgâl nkra) tât aơ gay ma uănh năl nau dơi bah ăp ntŭk kan báo chí tơm đah Luật./.