“Việt Nam lĕ dơi geh âk nău mhe khlăy tâm nău kan ntrôl pă nău dơi an ƀon lan rnoi đê̆”. Nĕ lah nău mbơh lah na nê̆ bâh Groi kruanh, groi kruanh Ủy ban Dân tộc Y Thông, kruanh mpôl kan Việt Nam ta rơh rƀŭn nchră tal 11 bâh Ủy ban công ước lam ntur neh mpeh jut jăng ăp nău tâm mưch tâm nglah mpôl rnoi CERD mhe geh ƀư at Geneva, Thụy Sỹ.

Mbơh tơih nău ta rơh rƀŭn nchră, Groi kruanh, groi chủ nhiệm Ủy ban dân tộc Y Thông. Kruanh mpôl Việt Nam ta Ủy ban công ước CERD lah na nê̆: bâh năm 2013 tât aƀaơ, trong kan pháp luật bâh Việt Nam mbro geh rdâk njêng n’hanh ƀư lôch tâm ban, tâm di tơm khlăy mpeh nău dơi bâh kon nuĭh tâm nĕ geh nău mat đăp mpăn nău dơi n’hanh nău geh tâm di bâh ƀon lan ăp mpôl rnoi. Tâm 10 năm ba năp, Quốc hội Việt Nam lĕ ntrŭnh mbơh 125 luật, tâm nĕ geh 352 điều khoản luật geh tât nău dơi n’hanh nău kan bâh ăp mpôl rnoi đê̆ nuĭh. Râng geh ta đak dak bah dih, Việt Nam lĕ nsrôih tât râng ăp rơh tâm mâp, rơh rƀŭn nchră peh nău dơi kon nuĭh, njrăng tâm mưch nglah mpôl rnoi, ton ƀư tĭng ăp nău tâm ton đah dak bah dih ma Việt Nam lah dak kan ndrel. Groi kruanh, groi Chủ nhiệm Ủy ban dân tộc Y Thông lah tay na nê̆ Việt Nam way geh ryơk n’hanh mât đăp mpăn ăp nău dơi an nuĭh rnoi đê̆ n’hanh nuĭh dak bah dih ta Việt Nam, ngăn lah bâh rnôk Việt Nam lăp kan ta công ước lam ntur neh mpeh jut nklơi ăp nău tâm mưch tâm nglah mpôl rnoi CERD ta năm 1982.