Bar hê nuĭh leo kan lĕ lah na nê̆ lĕ geh rơh tâm nchră dŭt geh nău dơi, tâm ban ŭch âk nkô̆ nău tâm kơl khay, n’hao nău dơi tâm boh kan đah bar dak. Kruanh dak Nguyễn Xuân Phúc an gĭt, đah rnoh prăk tăch rgâl bar ding geh 11,5 rmen đôlar ta năm 2021, sĭt tât ơm 2 năm n’hanh năm aơ mbra dơi geh 13 rmen đôlar.

Năm tay, bar dak mbra kahgĭt 10 năm kan ndrel, pơk luh plơp mhe ta nău tâm kơl bar dak. Tổng thống Indonesia Joko Widodo dăn đă Việt Nam nta nău dơh nơih an drăp ndơ Indonesia tăch ta Việt Nam, ngăn lah ndơ tuch tăm. Ndrel đah ntrôl tâm kơl pâl nđaih, nkre lah ntrôl ăp ntŭk kan hãng hàng không 2 dak an geh ƀư lôch ăp nău nchrăp kan gay ma pơk trong mpăr mhe đah Đà Nẵng n’hanh Java n’hanh n’hao ăp trong mpăr đah nkuăl ƀon têh Hồ Chí Minh n’hanh Jakarta.

Lôch nĕ, Tổng thống Joko Widodo lĕ leo rơh vơt răk ngêt sông gâl ngih dak kruanh dak Nguyễn Xuân Phúc.