Ta rơh tât khâl n’hanh pah kan ta Lào, mpôl đại biểu Hội đồng Dân tộc Quốc hội Việt Nam yor kruanh Hội đồng Dân tộc Y Thanh Hà Niê Kđăm leo hăn lĕ tât tâm ôp ngơi đah kruanh Quốc hội Lào Xaysomphone Phomvihane n’hanh ndrel leo rơh rƀŭn nchră tâm mbơh nău tă gĭt kan mpeh nău kan mpôl rnoi đah Chủ nhiệm ủy ban ăp mpôl rnoi Quốc hội Lào.

Ta rơh vơt, kruanh Hội đồng Dân tộc Y Thanh Hà Niê Kđăm lĕ geh nău mbơh tơih mpeh nău geh tâm kơl đah hội đồng Dân tộc Quốc hội Việt Nam n’hanh Ủy ban ăp mpôl rnoi Quốc hội Lào tâm ba năp nơh, trong kan tâm kơl tâm let năp tay n’hanh nău tâm rgop leo ƀư rơh tâm nchră mbơh tơih nău tă blău gĭt kan mpeh nău kan mpôl rnoi bâh 2 dak. Ta năp nĕ, hội đồng dân tộc Quốc hội Việt Nam n’hanh Ủy ban ăp mpôl rnoi Quốc hội Lào lĕ tâm rgop ƀư tâm nchră mbơh tơih nău mhe, tă gĭt kan mpeh nău kan rdâk njêng nău kơl mpeh pháp luật n’hanh uănh năl nău mbơh tơih ƀư tĭng ăp nău kơl mpeh nău mpôl rnoi, n’huch ach o nâp nâl, mât đăp mpăn rnă njrăng rêh jêng, tâm mbơh nău tă kan tâm nău kan uănh nđôi, hun hao nkual ƀon lan, jut jăng ach o, pă nău kan đăp mpăn an ƀon lan...Việt Nam n’hanh Lào n’hao nău tâm rgop đah ăp ntŭk kan ƀư nău kan mpôl rnoi.