Tâm rnôk hăn khâl Singapore (5-6/8), Bộ trưởng Tài chính Hồ Đức Phớc hŏ geh ăp rơh mâp, pah kan đah kruanh Bộ Tài chính n’hanh Nhih pah kan prăk kaih Singapore, lah rjăp nău hôm lhoi geh tâm boh dŭt âk, lơn  lah tâm trong kan prăk kaih kloh uĕh n’hanh prăk kaih mbrô. Tĭng Bộ trưởng Tài chính Hồ Đức Phớc, Singapore way lah dak  tâm boh khlay n’hanh mha êng bah Việt Nam ta lĕ rngôch ăp trong kan.

Tâm rnôk tâm boh chính trị-tâm boh dak bah dih hun hao uĕh lăng aƀaơ, bar dak nha hôm dŭt âk săk geh gay ntrŭt ntrôl  tâm boh jru hvi, tâm nê geh trong kan prăk kaih. Bộ trưởng Hồ Đức Phớc an gĭt, Việt Nam êng uănh khlay tât trong ƀư n’gluh an dŏng trái phiếu kloh uĕh  n’hanh rdâk njêng ntŭk tăch rgâl tín chỉ các-bon gay tât rnoh mô hôm n’gluh n’huk djơh tâm năm 2050 kơt nău ton ndơ̆ luh ta COP-26. Bah meng nê, Bộ trưởng ŭch rŏng dơi đă nuĭh hăn tât Singapore gay ntĭm nti mô lah jă ăp nuĭh rnâng kan Singapore tât kơi năp nti an cán bộ ta Việt Nam tâm trong kan công nghệ prăk kaih n’hanh prăk kaih mbrô.