VOV4.M’nông:  Ta Lâm Đồng chôt srê Covid-19 dơi uănh nđôi, khlay du đêt ndơ biăp-nkao lĕ ntơm hao, ƀon lan Đà Lạt dôl rgum ntuh kơl tay rdâk hao nkra njêng.

Jêh khay rngot rngăt, rlu nsrŭng nkra njêng yor rnoh khlay ăp ndơ lŏ mir jŭr thuk hô, roh dơm hô, âk mir nkao-biăp ta Đà Lạt n’hanh ăp nkual kiău ma bah n’gor Lâm Đồng lĕ ntơm nkra njêng tay, ngăch jur ntil gay ngăch pă an ntŭk tăch. Wa Nguyễn Thị Thu, ta phường 8, nkual ƀon têh Đà Lạt an gĭt, yor chôt srê lĕ ntơm dơi uănh nđôi, nău rdêng ndơ ntơm dơh lơn jêng du đêt ntil ndơ lŏ mir lĕ hao plơ̆ tay, tâm nĕ êng lah ndơ biăp xà lách lĕ hao nkôp đah nar bah năp. Yor rĭ wa n’hanh âk rnăk êng ta nkual dôl ndăn ntuh kơl nkra njêng tay gay ngăch pă an ăp ntŭk rwăt.

“Mhe aơ mô hôm geh biăp tay, xà lách hao khlay 1.000 prăk/tơm. Aƀaơ khlay plơ̆ tay 600 prăk tât 800 prăk/tơm nkôp đah êng năng nar bah năp mô geh srê Covid-19. Âk khay bah năp nuĭh ƀon lan đêt tăm yor tăm roh âk ir n’hanh mô dơi tăch, aƀaơ biăp hao khlay ri bu ntơm tăm tay. Uănh nsum biăp dôl hao, ƀon lan nsrôih an rgum nkra njêng tăm tay”.

Rnoh hao, nuĭh ƀon lan dôl nsrôih mât chăm nkao cúc gay pă an nău ŭch ntŭk tăch.

Mô knŭng ndơ biăp, nuĭh tăm nkao cúc ta Đà Lạt rhơn yor nkao lĕ hao ndal tât 30.000 prăk du bình cúc nsrŭt, 15.000 prăk/bình nkao cúc ngăn. Đah rnoh khlay aơ, du sào nkao cúc ƀon lan nsĭt geh 40 rkeh prăk. Tĭng wa Nguyễn Đình Thuận, ta phường 7, nkual ƀon têh Đà Lạt, mô êng dơi geh yor nar khay jong rlu tăm, tăch mô tŏng nău ŭch jêng rnoh khlay du đêt ndơ lŏ mir mơ hao khlay ndal. Ơm gĭt nău âk nuĭh ntuh kơl tay nkra njêng, mbra ntŭk rwăt ndơ tâm khay tât mô tâm ban, jêng tât nău geh roh rui, yơn đah nu nău chôt srê ntơm dơi uănh nđôi n’hanh đăp mpăn kơt aƀaơ, wa dŭt mpŏng ŭch nău nkra njêng mbra nsĭt tay săk rnglăy tâm ăp yan tât. Wa Nguyễn Đình Thuận, an gĭt:

“Lah nsum đah khlay nkao cúc kơt aƀaơ ri nuĭh tơm mir joi sa dơi đŏng, geh nsĭt săk rnglăy. Tâm năm e ta rnôk aơ nkao cúc dôl ta rnoh khlay 40.000 rbăn prăk hôm, năm aơ yor Covid-19 jêng lĕ hŭch ngăn. Ntŭk rwăt rnôk aơ he mô gĭt lor nău geh tât, aƀaơ tơm mir nkao cúc khlay hôm ăp ntil nkao êng an rôk jăng lĕ”.

Dơi gĭt, gay ntop kơl nuĭh ƀon lan, doanh nghiệp tăch ndơ lŏ mir, nău kan lŏ mir Lâm Đồng dôl ntrŭt ngăch ƀư trang mbơh nău tăch rgâl điện tử “Ndơ lŏ mir n’gor Lâm Đồng” lvang 2021-2025. Tĭng nĕ, ndơ lŏ mir ăp ntil dôl tâm yan mô lah êp geh sa mbra dơi nkoch mbơh kloh gay n’hao tay nău boăt nthoi nău ŭch, nău tăch, rgop đăp mpăn ntŭk tăch ndơ lŏ mir an nuĭh ƀon lan./.

          Nuĭh rblang: Y Sưng Phê Ja