Khoa Cấp cứu Hồi sức tích cực chống độc bah Ngih dak si nkual ƀon têh Buôn Ma Thuột lĕ nchrăp 6 nsưng tâm ngih dak si n’hanh 5 nsưng săm ndal nchrăp wơt nuĭh ji tâm rơh Tết. Nai dak si Trần Thanh Quý, Groi Khoa Cấp cứu Hồi sức tích cực chống độc, an gĭt:

Khoa lĕ geh nău nchrăp ăp nuĭh kâp uănh geh 1 hê nai dak si n’hanh 2 điều dưỡng n’hanh kâp măng nar nchrăp rdâng đah nu nău geh, lơn lah ăp nău khoh ndơ ngêt sa kơt prah tâm tom ndeh geh tâm rơh Tết.

Ngih dak si Đa khoa nkual Tây Nguyên, đah nău ƀư lah ngih dak si n’glêh dŭt bah nkual Tây Nguyên, tâm nu nău nchrăp rdâng đah ăp nuĭh sam ngăch mbăn n’hanh nu nău ndal. Nai dak si Nguyễn Doãn Sơn, Groi Kruanh Khoa Cấp cứu, an gĭt, tâm rơh Tết, rnoh nuĭh ji lăp săm ngăch dơi hao rlău 50% nkôp đah ăp nar, lơn lah ăp nuĭh prah tâm tom ndeh, kop ji mpeh play nuih n’hanh chôt ndal.

Mpôl hên mbra n’hao tay kâp uănh ntĭm rđău, n’hao tay nuĭh kâp uănh săm ngăch, du rmôt kâp uănh ntop tay n’hanh du rmôt kâp uănh nchrăp lor gay rnôk geh ăp nu nău rnoh nuĭh ji lăp âk mô lah ăp nuĭh rmanh ri mbră đă dâl. Bah meng nĕ mbra mbơh ƀư du rmôt kâp ta Khoa, lah geh nău đă mpôl hên mbra đă du nai dak si, 2 điều dưỡng hăn săm ngăch bah dih ngih dak si dâl.

Ndrel đah nău nchrăp nuĭh kan, ndoh ndơ n’hanh dak si, Ngih dak si Đa khoa Nkual Tây Nguyên uănh khlay tât nău mât uănh mpeh nuih n’hâm n’hanh drăp ndơ đah ăp nuĭh ji bĭch ngih dak si tâm rơh Tết. Nai dak si Nguyễn Ngọc Thịn, Groi Giám đốc Ngih dak si, an gĭt:

Lĕ rngôch ăp khoa jrô n’hanh lâm sàng mpôl hên nkah ntĭnh n’hŭch dăn rlu gay rgum tâm nău kâp uănh an nuĭh ji uĕh ngăn, êng đah khoa săm ngăch n’hanh hồi sức tích cực an kâp măng nar. Tâm rơh Tết aơ mpôl hên ƀư chơ Tết an nuĭh ji jêr jŏt, ntĭt nsa kơt ntop kơl phe, dak ngi, dak toh sĭk gay nuĭh ji geh du nău tết răm hơm.

Mô knŭng ăp ngih dak si gưl n’gor, ăp ngih dak si nkuăl lĕ nchrăp dŭt âk an rơh Tết Nguyên đán. Nai dak si Lê Thị Thủy, Giám đốc Ngih dak si nkuăl M’Drak, an gĭt:

Ban Giám đốc ntĭm rđău lĕ rngôch ăp khoa jrô, ngih dak si xă tâm nău nchrăp ăp nkô̆ nău đăp mpăn uĕh ngăn an mât uănh nuĭh ji ta lĕ 2 gưl, đah Ngih dak si nkuăl ri nchrăp mbơh ƀư rĭng ăp nkô̆ nău geh tât dak si, ndoh ndơ jêh nĕ tâm pă kâp, nuĭh kan gay đăp mpăn an ăp nău ƀư tâm trong kan săm ngăch nuĭh ji bah năp tâm n’hanh bah kơi Tết Nguyên đán.

Tâm ban ma nĕ, ta Ngih dak si nkuăl n’har bri Ea Súp, nai dak si Nguyễn Viết Hữu, Giám đốc Ngih dak si, mĭn lah đŏng:

Mpôl hên mô pă dak rlu rơh dŭt năm n’hanh Tết, đăp mpăn nuĭh  kan yŏng ăp kâp uănh, ƀư but uănh săm ji rhŏ an nuĭh ƀon lan tâm rơh Tết.

Nău kan dak si Dak Lak lĕ ƀư trong nchrăp bah ăp gưl bah n’gor tât ăp ngih dak si nkluăl, đăp mpăn trong kan but uănh săm ji n’hanh săm ngăch. Nai dak si Nguyễn Hữu Vũ Quang, Groi Giám đốc N’gâng kan dak si n’gor, nkoch:

N’gâng kan dak si lĕ geh sam ƀŭt njuăl tât ăp ntŭk kan nchrăp nuĭh, ndoh ndơ, nchrăp dak si tŏng ăp bah gưl nkuăl tât gưl n’gor. Nău kan dak si lĕ nchrăp an wơt dơn n’hanh rgum, dŏng lĕ rngôch ăp nuĭh ji ŭch tât ăp ngih dak si gay săm tâm rơh Tết. Kâp uănh kơt kâp njrăng n’har bri.

Đah nău nchrăp uĕh n’hanh nuih n’hâm lĕ đah nău kan âk bah rmôt y nai dak si, nău kan dak si Dak Lak lĕ nchrăp rdâng đah ăp nu nău geh tâm ăp nar tết. Bôl săm ngăch săm ndal mô lah mât uănh nuĭh ji ăp y nai dak si dŭt n’hâm mro, nsĭt tay du nău tết đăp mpăn hơm răm an nuĭh ƀon lan.