Ban ntĭm rđău ăp nău kan Trung ương lĕ ndâk njêng 5 rmôt ăp nău kan rgum tâm nău n’hao uănh nđôi ăp nău kan bah trung ương tât gưl xă lôch rơh Tết Nguyên đán Ất Tỵ n’hanh yan lễ hội Xuân năm 2025. Nkre đă ta ăp ntŭk, ƀư ndâk njêng ăp mpôl uănh nđôi ăp nău kan ăp gưl, bah n’gor tât gưl xă. Rgŏ jă dŭt n’hâm ăp trong mbơh rblang ăp nău ntrŭnh pháp luật mpeh đăp mpăn ndơ ngêt sa kơt ăp nău blău săch, mât prăp, nkret gâm n’hanh dŏng ndơ ngêt sa tât nuĭh ƀon lan. Tĭng N’gâng kan Tuch tăm mât rong n’hanh hun hao ƀon lan, rơh Tết Nguyên đán lah khay dŏng ndơ ngêt sa, ngăn lah ndơ mpô mpa hao âk, N’gâng kan tâm rgop đah ăp ngih pah kan dơi kan ndâk njêng 9 rmôt trong kan uănh nđôi, mât uănh ntŭk nkhĭt roch mpô mpa, uănh nđôi răk rao thú y ta 17 n’gor, nkual ƀon têh, lơn lah uănh nđôi poăch nglăp rwăt, tâm nĕ, uănh khlay 3 rmôt nău mpeh nuh srê, đăp mpăn ndơ ngêt sa n’hanh joi tu tơm. Wa Tống Xuân Chinh, Groi Cục trưởng Cục mât uănh, N’gâng kan Tuch tăm mât rong n’hanh hun hao ƀon lan an gĭt:

Đah dĭng lĕ mpôl aƀaơ ri mpôl hên an lah lĕ rngôch dơi đăp mpăn ndơ poăch, tăp dak toh an dŏng dŭt năm, tâm rơh geh âk lễ tết, lơn lah rơh tết nguyên đán. Tĭng nĕ, N’gâng kan tuch tăm mât rong n’hanh hun hao ƀon lan đă ăp n’gor, nkual ƀon têh ntĭm rđău ngih pah kan way kan, n’gâng kan ăp gưl tâm rgop nkoch trêng mbơh rblang nău ntrŭnh pháp luật mpeh đăp mpăn ndơ ngêt sa, khih n’hanh khuch bah nău dŏng chất mô an dŏng, rlău ma ndơ dơi an dŏng tâm nkra njêng bôk năp, sŏk, mât prăp, nkret gâm, nkra njêng ndơ sa lŏ mir, tui ka.

N’hêl na nê̆ ta Thủ đô Hà Nội Ban ntĭm rđău 389 nkual ƀon têh Hà Nội an gĭt, lĕ ơm an trong nchrăp hô ngăn đăp mpăn ndơ ngêt sa rhŏ an Tết nguyên đán Ất Tỵ n’hanh lễ hội Xuân năm 2025. UBND nkual ƀon têh Hà Nội ndâk njêng 4 rmôt uănh nđôi ăp nău kan hô ngăn uănh nđôi mpeh đăp mpăn ndơ ngêt sa gưl nkual ƀon têh. Uănh nđôi rgum tâm ăp ntŭk nkra njêng, tăch, nglăp rwăt ăp ntil ndơ, dơi dŏng âk tâm rơh Tết n’hanh lôch yan lễ hội. Ta gưl nkuăl, nkual têh, mbra ndâk njêng ăp mpôl uănh nđôi nău mbơh ƀư trong kan đăp mpăn ndơ ngêt sa rhŏ an lôch rơh lễ, tết ta ăp xă, phường, nkuăl têh. Wa Đoàn Thanh Phong, Chi cục trưởng Chi cục đăp mpăn ndơ ngêt sa nkual ƀon têh Hà Nội an gĭt:

Đah bôk nău đăp mpăn tay rnă njrăng ndơ ngêt sa tâm nu nău mhe, lơn lah rơh tết n’hanh lễ hội ri Mpôl uănh nđôi ăp nău kan hăn uănh nđôi na nê̆ ăp ntŭk tăch nkra njêng ndơ ngêt sa n’hanh tâm rnôk uănh nđôi ri lah geh ăp nău saơ ăp ntŭk tih mpeh đăp mpăn ndơ ngêt sa ri mpôl hêm mbra rmal n’hanh đă ăp ntŭk doanh nghiệp tĭng rjăp. Hôm đah ăp ntŭk nkra njêng tăch ndơ ngêt sa ma dôl tĭng rjăp ri mpôl hên đă tay ăp ntŭk mât uĕh tay nuih n’hâm nĕ.

Rhăt jăp mât uănh ntŭk tăch ndoh ndơ rhŏ an nău ŭch dŏng rơh Tết n’hanh lôch yan lễ hội, rmôt Mât uănh ntŭk tăch lam dak mbơh ƀư bah ơm Trong nchrăp hô ngăn njrăng tăch ntŭng, rlăm tăch rgâl n’hanh ndơ rlăm Tết Nguyên đán Ất Tỵ năm 2025; n’hao trong kan uănh nđôi ntŭk tăch n’hanh rmal rjăp ăp nău ƀư tih mpeh nău nkrâm ndơ, an rnoh khlay, tăch rgâl điện tử, tăch rgâl, rdêng, mâp prăp ndơ mô an dŏng, ndơ nglăp ntŭng, ndơ mô gĭt tu tơm, ndơ rlăm, ndơ tih nău dơi mĭn njêng êng, ndơ mô uĕh, uănh khlay ăp ntil ndơ dŏng âk, ndơ geh nău ŭch dŏng âk tâm rơh dŭt năm n’hanh Tết Nguyên đán. N’hao trong kan uănh nđôi, groi uănh đăp mpăn ndơ ngêt sa tâm ăp trong bah nkra njêng, nkret gâm tât dŏng; nsrôih njrăng n’gang n’hanh rmal rjăp ăp nuĭh, rmôt kan, ntŭk nkra njêng, tăch tih nău ntrŭnh mpeh đăp mpăn ndơ ngêt sa.

Wa Nguyễn Quang Huy, Groi Vụ Trưởng Vụ tổng hợp, trong nchrăp prăk kaih, Tổng cục mât uănh ntŭk tăch, N’gâng kan công thương an gĭt: rmôt mât uănh  ntŭk tăch mbra tâm rgop rjăp đah ăp ngih pah kan dơi kan n’hanh n’gâng kan ƀon lan rhăt jăp uănh nđôi ndoh ndơ bah mpông n’har bri lăp ntŭk tăch tâm dak.

Đah ntil ndơ ngêt sa nkual kâng n’har bri ri rmôt mât uănh ntŭk tăch tâm rgop rjăp đah ăp rmôt kan dơi kan ta mpông n’har bri ƀư uănh nđôi nking n’gang ndoh ndơ poăch mpa nglăp ntŭng bah nkual n’har bri trong ndeh, ndrâm dak lêng, trong ndeh păr mô rdêng lăp ntŭk tăch tâm dak. Ta ntŭk tăch tâm dak, rmôt mât uănh ntŭk tăch rgum uănh nđôi ndoh ndơ ta ăp ntŭk tăch, chợ bôk luh, chợ way tăch, chợ ƀon lan dŏng... uănh khlay nău ntrŭnh rnoh khlay, tăch đah rnoh lĕ an... Ntrôl dăng tay trong kan njrăng n’gang tăch ntŭng mplư rlăm tăch rgâl n’hanh ndơ rlăm ta ăp ntŭk mạng, ngăn lah mạng xã hội.

Rhăt jăp mât uănh đăp mpăn ndơ ngêt sa rơh tết Nguyên đán Ất Tỵ 2025 n’hanh yan lễ hội 2025, nău ƀư bah ăp ntŭk dŭt khlay. Lơn lah, ăp ntŭk nkra njêng, tăch rgâl ndơ ngêt sa lŏ mir geh âk, ƀư roh đăp mpăn ndơ ngêt sa, nău ŭch dŏng âk tâm rơh lễ, tết bah nuĭh ƀon lan. Ăp nău tih mpeh đăp mpăn ndơ ngêt sa saơ an dơi rmal rjăp, tŏng ăp nău ntêt nkri n’hanh mbơh tâm trong mbơh nău mhe tĭng di nău ntrŭnh bah pháp luật. Ăp nuĭh ƀon lan mô lah năch wât gay đăp mpăn săk soan an nơm n’hanh rnăk wâl, ndrel neh dak geh yan năm mhe lôch uĕh.